ആലപ്പുഴ: കൂച്ച് ബിഹാര്‍ ട്രോഫി അണ്ടര്‍ 19 ക്രിക്കറ്റ് പോരാട്ടത്തില്‍ കേരളത്തിന് കനത്ത തോല്‍വി. ബംഗളിനോട് ഒരിന്നിങ്‌സിനും 29 റണ്‍സിനുമാണ് കേരളം തോല്‍വി വഴങ്ങിയത്. ആദ്യം ബാറ്റ് ചെയ്ത ബംഗാള്‍ ഒന്നാം ഇന്നിങ്‌സില്‍ 360 റണ്‍സ് കണ്ടെത്തി.
കേരളം ഒന്നാം ഇന്നിങ്‌സില്‍ 94 റണ്‍സില്‍ പുറത്തായി ഫോളോ ഓണ്‍ വഴങ്ങി. രണ്ടാം ഇന്നിങ്‌സിനിറങ്ങിയ കേരളത്തിന്റെ പോരാട്ടം 237 റണ്‍സില്‍ അവസാനിപ്പിച്ചാണ് ബംഗാള്‍ മികച്ച വിജയം സ്വന്താമാക്കിയത്. ജയത്തോടെ ബോണസടക്കം ഏഴ് പോയിന്റ് സ്വന്തമാക്കാനും ബംഗാളിന് സാധിച്ചു.
ഒന്നാം ഇന്നിങ്‌സില്‍ നാലും രണ്ടാം ഇന്നിങ്‌സില്‍ അഞ്ചും വിക്കറ്റുകള്‍ വീഴ്ത്തി കേരളത്തിന്റെ ബാറ്റിങ് നിരയെ തകര്‍ത്ത കരണിന്റെ ബൗളിങാണ് ബംഗാളിന് വിജയം സമ്മാനിക്കുന്നതില്‍ നിര്‍ണായകമായത്.
രണ്ടാം ഇന്നിങ്‌സില്‍ 62 റണ്‍സെടുത്ത വത്സലിന്റെ ബാറ്റിങാണ് കേരളത്തിന്റെ സ്‌കോര്‍ 200 കടത്തിയത്. ബംഗാളിനായി ആദ്യ ഇന്നിങ്‌സില്‍ ദിബ്യ (110) സെഞ്ച്വറി നേടി. കേരള ബൗളര്‍മാരില്‍ അഞ്ച് വിക്കറ്റ് വീഴ്ത്തി വിനില്‍ ടി.എസ് തിളങ്ങി.