ഹൈദരാബാദ്: പരിശീലന പറക്കലിനിടയില്‍ വ്യോമ സേനാ വിമാനം തകര്‍ന്നുവീണു. ഹക്കിംപെട്ട് വ്യോമതാവളത്തില്‍ നിന്ന് പറന്നുയര്‍ന്ന കിരണ്‍ വിഭാഗത്തില്‍ പെട്ട പരിശീലന വിമാനമാണ് തകര്‍ന്നത്. വിമാനം പറത്തിയിരുന്ന വനിതാ പൈലറ്റ് പരുക്കേല്‍ക്കാതെ രക്ഷപ്പെട്ടു.
തകരാറിനെ തുടര്‍ന്ന് വിമാനം അടിയന്തരമായി നിലത്തിറക്കാന്‍ ശ്രമിച്ചിരുന്നെങ്കിലും ഇത് അസാധ്യമായതോടെ പൈലറ്റ് പാരച്യൂട്ട് വഴി രക്ഷപ്പെടുകയായിരുന്നു. അപകടത്തിന് കാരണം യന്ത്രത്തകരാറാണെന്നാണ് പ്രാഥമിക വിവരം.
ജനവാസമില്ലാത്ത പ്രദേശത്താണ് വിമാനം തകര്‍ന്നുവീണത്. അപകടത്തിനിടയാക്കിയ സാഹചര്യത്തെക്കുറിച്ച് വ്യോമ സേന അന്വേഷണത്തിന് ഉത്തരവിട്ടിട്ടുണ്ട്.