കഠിനംകുളം: റോഡില്‍ തെന്നിവീണ ബൈക്കില്‍ കാറിടിച്ച് ബൈക്ക് യാത്രികനായ യുവാവ് മരിച്ചു. ഒപ്പം യാത്ര ചെയ്തിരുന്ന യുവാവിന് ഗുരുതര പരുക്കേറ്റു. കണിയാപുരം പളളിനട കവിളാകത്ത് വീട്ടില്‍ അബ്ദുല്‍ വാഹിദ് സഫിയ ദമ്പതികളുടെ മകന്‍ അഷറുദ്ദീന്‍ (20) ആണ് മരിച്ചത്.ഒപ്പം സഞ്ചരിച്ചിരുന്ന  പള്ളി നട സ്വദേശിയായ റഫീക്കിനെ ഗുരുതര പരുക്കുകളോടെ തിരുവനന്തപുരത്തെ സ്വകാര്യ ആശുപത്രിയില്‍ പ്രവേഷിപ്പിച്ചു. ഇന്നലെ പുലര്‍ച്ചെ ഒരു മണിയോടെ പടിഞ്ഞാറ്റ്മുക്ക് ജങ്ഷനിലുള്ള വളവിലായിരുന്നു അപകടം. വെട്ടു റോഡിലുള്ള രാഗം ഓഡിറ്റോറിയത്തില്‍ നിന്നും കാറ്ററിങ് ജോലി കഴിഞ്ഞ് വീട്ടിലേക്ക് മടങ്ങവേ  അഷറുദ്ദീന്‍ ഓടിച്ചിരുന്ന ബൈക്ക് തെന്നി വീണു. ഇതിനിടയില്‍  പുറകില്‍ നിന്നും വന്ന കാര്‍ ബൈക്കിനെ ഇടിച്ച് തെറിപ്പിക്കുകയായിരുന്നു. കാറിലുണ്ടായിരുന്നവരും പരിസരവാസികളും   ഇരുവരേയും ആശുപത്രിയിലേക്ക് എത്തിച്ചെങ്കിലും അഷറുദ്ദീന്‍ വഴിമധ്യേ മരിച്ചു. ഹസീനയും അഫ്‌സലുമാണ്  അഷറുദ്ദീന്റെ സഹോദരങ്ങള്‍. മൃതദേഹം പോസ്റ്റ്‌മോര്‍ട്ടത്തിന് ശേഷം കണിയാപുരം പളളി നടമുസ്ലിം ജമാഅത്തില്‍ ഖബറടക്കി.