ഗാന്ധിനഗര്‍: തെരഞ്ഞെടുപ്പ് പ്രചാരണത്തിനായി പ്രധാനമന്ത്രി നരേന്ദ്രമോദി ഇന്ന് ഗുജറാത്തിലെത്തും. തെരഞ്ഞടുപ്പ് പ്രഖ്യാപിച്ചതിന് ശേഷമുള്ള മോദിയുടെ ആദ്യ റാലിയാണ് ഇന്ന് കച്ചിലെ ഭുജ്ജില്‍ നടക്കുന്നത്.

രാവിലെ പത്തരയ്ക്ക് നടക്കുന്ന റാലിയ്ക്ക് ശേഷം മൂന്നിടത്തെ സമ്മേളത്തില്‍ കൂടി മോദി പങ്കെടുക്കും.

ആദ്യഘട്ട വോട്ടെടുപ്പ് നടക്കുന്ന സൗരാഷ്ട്രയിലും ദക്ഷിണ ഗുജറാത്തിലും എട്ടു റാലികളാണ് ഇന്നും ബുധനാഴ്ചയുമായി മോദി നടത്തുന്നത്.

ബി.ജെ.പി അധ്യക്ഷന്‍ അമിത് ഷാ, കേന്ദ്രമന്ത്രിമാരായ രാജ്‌നാഥ് സിംഗ്, അരുണ്‍ ജെയ്റ്റ്‌ലി തുടങ്ങി മുപ്പതിലധികം നേതാക്കളും ബി.ജെ.പി ഭരിക്കുന്ന ഇതര സംസ്ഥാനങ്ങളിലെ മുഖ്യമന്ത്രിമാരും മറ്റ് പ്രമുഖ നേതാക്കളുമാണ് പ്രചാരണത്തിനായി സംസ്ഥാനത്തുടനീളം ഉണ്ടാവുക.

പട്ടേല്‍ സമുദായത്തിന്റെ പിന്തുണ തിരികെപ്പിടിക്കാന്‍ നരേന്ദ്രമോദിയ്ക്കാവുമെന്നാണ് ബി.ജെ.പി കണക്കുകൂട്ടുന്നത്.