ന്യൂഡല്‍ഹി: രഞ്ജി ട്രോഫി ക്രിക്കറ്റില്‍ ഗ്രൂപ്പ് ഘട്ട മത്സരങ്ങള്‍ സമാപിച്ച് വമ്പന്‍ ടീമുകള്‍ മുന്നേറിയതോടെ ക്വാര്‍ട്ടര്‍ മത്സരങ്ങളുടെ ഷെഡ്യൂള്‍ പുറത്തുവിട്ടു. തകര്‍പ്പന്‍ ജയത്തോടെ ക്വാര്‍ട്ടറിലെത്തിയെങ്കിലും കേരളത്തെ കാത്തിരിക്കുന്നത് അഗ്നിപരീക്ഷയാണ്. വിദര്‍ഭയ്‌ക്കെതിരേയാണ് ടീമിന്റെ പോരാട്ടം. സൂറത്തിലാണ് മത്സരം നടക്കുക. ഡിസംബര്‍ ഏഴു മുതല്‍ മത്സരങ്ങള്‍ ആരംഭിക്കും. കേരളം അടങ്ങുന്ന ബി ഗ്രൂപ്പിലെ ജേതാക്കളായ ഗുജറാത്തിന് ബംഗാളാണ് എതിരാളി. ഡല്‍ഹി മധ്യപ്രദേശിനെയും കര്‍ണാടക മുംബൈയെയും നേരിടും.
നിരവധി പ്രത്യേകതകളുമായിട്ടാണ് ക്വാര്‍ട്ടര്‍ ആരംഭിക്കുന്നത്. ക്വാര്‍ട്ടറില്‍ പുതിയൊരു സ്റ്റേഡിയം ആദ്യ രഞ്ജി മത്സരത്തിനായി ഒരുങ്ങുന്നുണ്ടെന്നതാണ് പ്രത്യേകതകളിലൊന്ന്. ആദ്യമായി ഒരു രഞ്ജി ട്രോഫി മത്സരം ടി.വിയില്‍ സംപ്രേഷണം ചെയ്യുന്നതാണ് മറ്റൊന്ന്.
41 തവണ ജേതാക്കളായ മുംബൈയും ഫോമിലുള്ള കര്‍ണാടകയും തമ്മിലുള്ള മത്സരമായിരിക്കും സംപ്രേഷണം ചെയ്യുക. ബി.സി.സി.ഐയുടെ സംപ്രേഷണാവകാശമുള്ള പങ്കാളികളുമായി ചേര്‍ന്നായിരിക്കും മത്സരം സംപ്രേഷണം ചെയ്യുക. നേരത്തെ ഗ്രൂപ്പ് ഘട്ടത്തിലെ ചില മത്സരങ്ങള്‍ വെബ് വഴി സംപ്രേഷണം ചെയ്തിരുന്നു.
അതേസമയം വിജയവാഡയിലെ ഡോ.ഗോകരാജു ലിയാല ഗംഗാരാജു സ്റ്റേഡിയമാണ് ആദ്യ രഞ്ജി മത്സരത്തിനായി ഒരുങ്ങുന്നത്. ഡല്‍ഹിയും മധ്യപ്രദേശും തമ്മിലുള്ള മത്സരമാണ് ഇവിടെ നടക്കുക. ഡല്‍ഹി നായകന്‍ ഇഷാന്ത് മത്സരത്തില്‍ കളിക്കില്ല. ലങ്കയ്‌ക്കെതിരായ ടെസ്റ്റ് മത്സരത്തിനായി ഇന്ത്യന്‍ ടീമിനൊപ്പമാണ് ഇഷാന്ത്. എന്നാല്‍ അന്താരാഷ്ട്ര മത്സരങ്ങള്‍ ഈ സ്റ്റേഡിയത്തില്‍ നേരത്തെ നടന്നിട്ടുണ്ട്. ഇന്ത്യന്‍ വനിതാ ടീമും വെസ്റ്റിന്‍ഡീസും തമ്മിലുള്ള മത്സരമാണ് ഇവിടെ നടന്നത്.