ന്യൂയോര്‍ക്ക്: സ്ത്രീ സംരംഭകത്വങ്ങള്‍ക്കായുള്ള മകള്‍ ഇവാന്‍കയുടെ ശ്രമങ്ങളെ അഭിനന്ദിച്ച് ഡൊണാള്‍ഡ് ട്രംപ്. ആഗോള സംരംഭകത്വ ഉച്ചകോടിയുമായി ബന്ധപ്പെട്ട് ഇന്ത്യ സന്ദര്‍ശിക്കുന്ന ഇവാന്‍കയുടെ പ്രവര്‍ത്തനങ്ങളെ ട്രംപ് പുകഴ്ത്തി. ഇവാന്‍കയുടെ നേതൃത്വത്തില്‍ നടക്കുന്നത് മികച്ച പ്രവര്‍ത്തനമാണെന്ന് ട്രംപ് ട്വീറ്റ് ചെയ്തു.
ഹൈദരാബാദില്‍ നടക്കുന്ന ഉച്ചകോടിയില്‍ 350 അംഗ അമേരിക്കന്‍ അംഗങ്ങളെ നയിക്കുന്നത് ഇവാന്‍കയാണ്. ഇന്ത്യയും അമേരിക്കയും ചേര്‍ന്നാണ് പരിപാടിക്ക് ആതിഥേയത്വം വഹിക്കുന്നത്. സ്ത്രീകള്‍ക്ക് പ്രഥമ സ്ഥാനം, എല്ലാവര്‍ക്കും അഭിവൃദ്ധി എന്നതാണ് ഉച്ചകോടിയുടെ മുദ്രാവാക്യം. ഇന്ന് അവസാനിക്കുന്ന ഉച്ചകോടിയില്‍ 150 രാജ്യങ്ങളില്‍ നിന്നുള്ള 1500 സംരംഭകര്‍ പങ്കെടുക്കുന്നുണ്ട്.ട്രംപിന്റെ ഉപദേശകയായി തെരഞ്ഞെടുത്തതിന് ശേഷമുള്ള ഇവാന്‍കയുടെ ഇന്ത്യയിലെ ആദ്യ സന്ദര്‍ശനമാണിത്.