കൊയിലാണ്ടി: ഒരു സ്വാതന്ത്ര്യദിനം കൂടി പിന്നിടുമ്പോഴും സ്വാതന്ത്ര്യ സമരപോരാട്ട ചരിത്രത്തിന്റെ പ്രതീകമായ ചേമഞ്ചേരിയിലെ ക്വിറ്റ് ഇന്ത്യാ സ്മാരകം വിസ്മൃതിയിലേക്കു മറയുന്നു. ക്വിറ്റ് ഇന്ത്യാ സമരത്തിന്റെ ഭാഗമായി 1942 ഓഗസ്റ്റ് 19നാണ് ബ്രിട്ടീഷ് ആധിപത്യത്തിന്റെ പ്രതീകങ്ങളായ ചേമഞ്ചേരി സബ് രജിസ്ട്രാര്‍ ഓഫിസ്, തിരുവങ്ങൂര്‍ അംശകച്ചേരി, റെയില്‍വേ സ്റ്റേഷന്‍, തിരുവങ്ങൂര്‍ ട്രെയിന്‍ ഹാള്‍ട്ട് എന്നിവ തീവച്ചു നശിപ്പിക്കപ്പെട്ടത്.
റെയില്‍വേ സ്റ്റേഷന്‍ കെട്ടിടം നവീകരിച്ചെങ്കിലും രജിസ്ട്രാര്‍ ഓഫിസ് കെട്ടിടം ആരും ഇതുവരെ തിരിഞ്ഞുനോക്കിയിട്ടില്ല. സമരത്തില്‍ പങ്കെടുത്ത സേനാനികളുടെ ഓര്‍മയ്ക്കായി പഴയ രജിസ്ട്രാര്‍ ഓഫിസിനു മുന്നില്‍ സ്മൃതിമണ്ഡപം ഉയര്‍ത്തിയിട്ടുണ്ട്. ക്വിറ്റ് ഇന്ത്യാ സമരത്തന്റെ 50-ാം വാര്‍ഷികദിനത്തില്‍ ഉയര്‍ന്ന ഈ സ്മൃതിമണ്ഡപവും തകര്‍ച്ചയുടെ വക്കിലാണ്. കെട്ടിടം ചരിത്ര സ്മാരകമെന്ന നിലയില്‍ പുനര്‍നിര്‍മിക്കാനുള്ള പ്രവര്‍ത്തനങ്ങളും എവിടെയുമെത്തിയിട്ടില്ല.
പഴയ കെട്ടിടം വാസ്തുശില്‍പ തനിമ ചോര്‍ന്നുപോകാതെ പുനര്‍നിര്‍മിക്കുകയെന്ന ലക്ഷ്യത്തോടെ പൊതുമരാമത്തു വകുപ്പ് കെട്ടിട നിര്‍മാണവിഭാഗം 75 ലക്ഷം രൂപയുടെ എസ്റ്റിമേറ്റ് തയാറാക്കുകയും സര്‍ക്കാരിന്റെ ഭരണാനുമതിക്കായി സമര്‍പ്പിക്കുകയും ചെയ്തിരുന്നു. എന്നാല്‍ ഇതില്‍ തുടര്‍ നടപടിയൊന്നുമുണ്ടായില്ല. സ്വകാര്യവ്യക്തിയുടെ കൈവശത്തിലായിരുന്ന ഓഫിസ് സ്ഥലവും കെട്ടിടവും ചേമഞ്ചേരി പഞ്ചായത്ത് ഏറ്റെടുത്ത് രജിസ്ട്രാര്‍ വിഭാഗത്തിനു കൈമാറിയിരുന്നു.
ഏറ്റെടുത്ത 16 സെന്റില്‍ ഏഴര സെന്റ് സ്ഥലമാണ് രജിസ്ട്രാര്‍ ഓഫിസ് നിര്‍മാണത്തിനായി കൈമാറിയത്. എന്നാല്‍ കൈമാറിയ സ്ഥലം ദേശീയപാതയ്ക്കു തൊട്ടടുത്തായതിനാല്‍ ഭാവിയില്‍ ദേശീയപാത വികസിപ്പിക്കുമ്പോള്‍ ബാക്കി സ്ഥലംകൂടി കെട്ടിട നിര്‍മാണത്തിനായി വിട്ടുകൊടുക്കേണ്ടിവരും. ഇതിനു പഞ്ചായത്ത് സന്നദ്ധമാണെന്നും നേരത്തെ ബന്ധപ്പെട്ടവരെ അറിയിച്ചിരുന്നതാണ്.