ന്യൂഡല്‍ഹി: ഏകീകൃത ചരക്ക് സേവന നികുതി 18 ശതമാനമായി നിജപ്പെടുത്തണമെന്ന ആവശ്യത്തെ വിമര്‍ശിച്ച പ്രധാനമന്ത്രി നരേന്ദ്ര മോദിക്കെതിരേ മുന്‍ ധനകാര്യ മന്ത്രിയും കോണ്‍ഗ്രസ് നേതാവുമായ പി. ചിദംബരം.
ഭാവിയില്‍ ഏകീകൃത ചരക്ക് സേവന നികുതി 18 ശതമാനത്തിലേക്ക് കൊണ്ടുവരുമെന്ന ദേശീയ സാമ്പത്തിക ഉപദേഷ്ടാവിന്റെ നിര്‍ദേശം പരിഗണിക്കാതെ ഇക്കാര്യം ആവശ്യപ്പെട്ട കോണ്‍ഗ്രസിനെ മോദി രൂക്ഷമായി വിമര്‍ശിക്കുകയായിരുന്നു. ഈ സാഹചര്യത്തിലാണ് മോദി രാജ്യത്തെ സാമ്പത്തിക ഉപദേഷ്ടാവിനെകൂടി വിഡ്ഢിയാക്കുകയാണോയെന്ന് അദ്ദേഹം ചോദിച്ചത്.
ജി.എസ്.ടി സംബന്ധിച്ച കാര്യങ്ങളില്‍ രാഹുല്‍ നടത്തിയ അഭിപ്രായപ്രകടനങ്ങളെ ഗുജറാത്തിലെ തെരഞ്ഞെടുപ്പ് റാലിയിലാണ് മോദി വിമര്‍ശിച്ചത്.
ജി.എസ്.ടിയില്‍ ഏകീകരണം വേണമെന്നും അത് 18 ശതമാനത്തില്‍ നിജപ്പെടുത്തണമെന്നുമായിരുന്നു രാഹുല്‍ ഗാന്ധി ആവശ്യപ്പെട്ടിരുന്നത്.
ഈ ആവശ്യത്തെ പരിഹസിക്കുകയും രാഹുലിന്റെ ആവശ്യം വിഡ്ഢിത്തം നിറഞ്ഞതാണെന്നുമായിരുന്നു മോദിയുടെ പ്രതികരണം. ദേശീയ സാമ്പത്തിക വിദഗ്ധന്‍ അരവിന്ദ് സൂബ്രഹ്്മണ്യനടക്കമുള്ള സാമ്പത്തിക വിദഗ്ധരെ വിഡ്ഢികളാക്കുന്ന രീതിയിലാണ് മോദിയുടെ പരാമര്‍ശമെന്നാണ് ചിദംബരം ഇതിനോട് പ്രതികരിച്ചത്.