ന്യൂഡല്‍ഹി: താരങ്ങളുടെ വരുമാനം കൂട്ടണമെന്ന ഇന്ത്യന്‍ ക്രിക്കറ്റ് ടീം നായകന്‍ വിരാട് കോഹ്‌ലിയുടെ ആവശ്യത്തിന് പിന്തുണയുമായി മുന്‍ നായകന്‍ സൗരവ് ഗാംഗുലി. ക്രിക്കറ്റ് ബോര്‍ഡിന് കൂടുതല്‍ വരുമാനം ലഭിക്കുന്നുണ്ടെങ്കില്‍ അത് താരങ്ങള്‍ക്ക് കൂടി അവകാശപ്പെട്ടതാണെന്ന് സൗരവ് ഗാംഗുലി പറഞ്ഞു.

ഐ.പി.എല്‍ സംപ്രേഷണാവകാശവുമായി ബന്ധപ്പെട്ട് വന്‍ തുകയാണ് ബി.സി.സി.ഐക്ക് വരുമാനമായി ലഭിക്കാന്‍ പോവുന്നത്. അതിനാല്‍ തന്നെ താരങ്ങളുടെ വരുമാനം വര്‍ധിപ്പിക്കണമെന്ന് ഇന്ത്യന്‍ ക്യാപ്റ്റന്‍ വിരാട് കോഹ്‌ലി ആവശ്യപ്പെട്ടിരുന്നു.

ക്രിക്കറ്റ് ഫീല്‍ഡില്‍ എന്ന പോലെ തന്നെ ഗാംഗുലി ക്യാപ്റ്റനായിരുന്ന കാലത്താണ് താരങ്ങളുടെ വരുമാന കാര്യത്തിലും മറ്റും കൃത്യമായ കരാര്‍ ബി.സി.സി.ഐയുമായി ഉണ്ടാക്കിയത്. 2004ലാണ് ബോര്‍ഡും താരങ്ങളും തമ്മില്‍ എല്ലാ വര്‍ഷവും കരാര്‍ പുതുക്കണമെന്ന വ്യവസ്ഥ വന്നത്. താരങ്ങള്‍ക്ക് പരുക്കോ മറ്റോ പറ്റി വിശ്രമം ആവശ്യമായി വന്നാല്‍ ബോര്‍ഡി സഹായം നല്‍കണമെന്നും വ്യവസ്ഥ ഉണ്ടായിരുന്നു.

'ക്രിക്കറ്റ് ബോര്‍ഡിന് വരുമാനം ലഭിക്കുന്നുവെങ്കില്‍ അതിലൊരു പങ്ക് താരങ്ങള്‍ക്ക് അവകാശപ്പെട്ടതാണ്. ഇക്കാര്യത്തില്‍ വിരാടിന്റെ അഭിപ്രായം ബി.സി.സി.ഐ പരിഗണിക്കണം. 15-20 വര്‍ഷം മാത്രം ക്രിക്കറ്റ് കളിക്കുന്ന താരങ്ങളുടെ കാര്യത്തില്‍ ഇത് ന്യായമായ ആവശ്യമാണ്.' ഗാംഗുലി പറഞ്ഞു.