ന്യൂഡല്‍ഹി: മുത്വലാഖ് സുപ്രിം കോടതി അസാധുവാക്കിയതോടെ അപ്രകാരംചെയ്യുന്നവരെ കര്‍ശനമായി ശിക്ഷിക്കാനുള്ള നിയമത്തിന്റെ കരട് തയാറായി. നിയമംലഘിച്ച് മുത്വലാഖ് മുഖേന ഭാര്യയെ മൊഴിചൊല്ലുന്നവര്‍ക്ക് മൂന്ന് വര്‍ഷം തടവും പിഴയും കരട് നിയമത്തില്‍ വ്യവസ്ഥ ചെയ്യുന്നു.
1986ലെ മുസ്്‌ലിം സ്ത്രീ (വിവാഹമോചനത്തില്‍ നിന്നുള്ള അവകാശ സംരക്ഷണം) നിയമം ഭേദഗതിചെയ്താണ് കരട് തയാറാക്കിയിരിക്കുന്നത്. ഇതുപ്രകാരം മുത്വലാഖ് മുഖേന മൊഴിചൊല്ലപ്പെടുന്ന സ്ത്രീകള്‍ക്ക് കോടതിയെ സമീപ്പിക്കാം.
ഭര്‍ത്താവില്‍ നിന്ന് ഉപജീവനമാര്‍ഗവും ആവശ്യപ്പെടാനും സ്ത്രീക്ക് അവകാശമുണ്ട്. ജോലിലഭ്യമായിട്ടില്ലാത്തവരോ പ്രായപൂര്‍ത്തിയെത്താത്തവരോ ആയ മക്കളുണ്ടെങ്കില്‍ അവരുടെ ചെലവിലേക്കും തുക ആവശ്യപ്പെടാം. കരട് ബില്ല് ഈ മാസം 15ന് തുടങ്ങുന്ന പാര്‍ലമെന്റ് സമ്മേളനത്തില്‍ അവതരിപ്പിക്കും.
മുത്വലാഖ് ഒന്നിച്ചുചൊല്ലുന്നു എന്ന് നേരിട്ടോ എഴുത്തിലൂടെയോ ഇലക്ട്രോണിക് സംവിധാനം ഉള്‍പ്പെടെയുള്ള മാധ്യമം മുഖേനയോ അറിയിക്കുന്നത് സുപ്രിം കോടതി അസാധുവാക്കിയിട്ടുണ്ടെന്ന് കരട് വിശദീകരിക്കുന്നു.
മുതിര്‍ന്ന കേന്ദ്രമന്ത്രിമാരായ രാജ്‌നാഥ് സിങ്, സുഷമാസ്വരാജ്, അരുണ്‍ജെയ്റ്റ്‌ലി, രവിശങ്കര്‍ പ്രസാദ് എന്നിവരടങ്ങുന്ന മന്ത്രിസഭാ ഉപസമിതിയാണ് കരടിന് രൂപം നല്‍കിയത്. സുപ്രിം കോടതി വിലക്കിയെങ്കിലും മുത്വലാഖ് വീണ്ടും തുടരാനുള്ള സാധ്യതയുണ്ടെന്നു ചൂണ്ടിക്കാട്ടിയാണ് അത് ക്രിമിനല്‍ കുറ്റമായി കണ്ട് കടുത്ത ശിക്ഷ കൊണ്ടുവരുന്നതെന്നാണ് കരട് സംബന്ധിച്ചുള്ള വിശദീകരം.
അഭിപ്രായം ആരാഞ്ഞ് സംസ്ഥാന സര്‍ക്കാരുകള്‍ക്ക് കേന്ദ്രസര്‍ക്കാര്‍ കരട് നിയമം അയച്ചിട്ടുണ്ട്. കരട് നിയമം ഭരണഘടനാപരമായി പ്രത്യേക പദവിയുള്ള ജമ്മുകശ്മിരിനു ബാധകമല്ല.