തൃശൂര്‍: സംസ്ഥാന സ്‌കൂള്‍ കലോത്സവത്തിന്റെ ലോഗോ പ്രകാശനം ചെയ്തു. തൃശൂര്‍ മോഡല്‍ ഗേള്‍സ് ഹൈസ്‌കൂളില്‍ നടന്ന ചടങ്ങില്‍ കെ.വി അബ്ദുള്‍ഖാദര്‍ എം.എല്‍.എയാണ് ലോഗോ പ്രകാശനം ചെയ്തത്. മന്ത്രി വി.എസ് സുനില്‍കുമാര്‍ സമ്മേളനം ഉദ്ഘാടനം ചെയ്തു. കണ്ണൂര്‍ പയ്യന്നൂര്‍ ബോയ്‌സ് സ്‌കൂളിലെ ചിത്രകലാ അധ്യാപകന്‍ സൈമണ്‍ പയ്യന്നൂരാണ് ലോഗോ രൂപകല്‍പ്പന ചെയ്തത്
58-ാമത് സംസ്ഥാന കലാമേളയുടേയും പൂരനാടിന്റേയും സാംസ്‌കാരിക ചിഹ്നങ്ങള്‍ ലോഗോയില്‍ സന്നിവേശിപ്പിച്ചിട്ടുണ്ട്. എഴുപതോളം ലോഗോകളില്‍ നിന്നാണ് സൈമണ്‍ പയ്യന്നൂരിന്റെ ലോഗോ കലോത്സവത്തിനായി തെരഞ്ഞെടുത്തത്. കലാമേളയുടെ സംഘാടക സമിതി ഓഫിസ് മന്ത്രി വി.എസ് സുനില്‍കുമാര്‍ ഉദ്ഘാടനം ചെയ്തു. എം.എല്‍.എമാരായ കെ.യു അരുണന്‍, കെ.രാജന്‍, കെ.വി അബ്ദുള്‍ഖാദര്‍, യു.ആര്‍ പ്രദീപ് എന്നിവര്‍ യോഗത്തില്‍ പങ്കെടുത്തു. മേയര്‍ അജിതാ ജയരാജന്‍ അധ്യക്ഷയായി.
പൊതു വിദ്യാഭ്യാസ ഡയറക്ടര്‍ കെ.വി മോഹന്‍കുമാര്‍, ജില്ലാ വിദ്യാഭ്യാസ ഓഫിസര്‍ കെ.സുമതി, മഞ്ജുളാ അരുണന്‍, ലാലി ജെയിംസ്, വര്‍ഗീസ് കണ്ടംകുളത്തി, എം.എല്‍ റോസി, സബ് കലക്ടര്‍ രേണുരാജ് എന്നിവര്‍ പങ്കെടുത്തു.