അബുജ: നൈജീരിയയില്‍ പച്ചക്കറി മാര്‍ക്കറ്റില്‍ നടന്ന ചാവേര്‍ സ്‌ഫോടനത്തില്‍ 13 പേര്‍ കൊല്ലപ്പെട്ടു. നിരവധി പേര്‍ക്ക് പരുക്കേല്‍ക്കുകയും ചെയ്തിട്ടുണ്ട്.
ഭീകരവാദ സംഘമായ ബോകോ ഹറം രൂപം കൊണ്ട നഗരമായ മൈദുഗുരിയിയില്‍നിന്ന് 185 കി.മീറ്റര്‍ അകലെയാണ് ആക്രമണം നടന്നത്. രണ്ട് പെണ്‍ ചാവേറുകളാണ് ആക്രമണം നടത്തിയതെന്ന് ദൃക്‌സാക്ഷികള്‍ പറഞ്ഞു. ഇവിടെ ഒരു എന്‍.ജി.ഒയുടെ ഭക്ഷ്യവിതരണ കേന്ദ്രത്തിലെത്തിയ ചാവേര്‍ പൊട്ടിത്തെറിച്ചാണ് ഇത്രയും പേര്‍ മരിച്ചത്. ഭക്ഷണത്തിനായി വരിനില്‍ക്കുന്നവരുടെ കൂടെ നിന്ന ഈ സ്ത്രീ സ്വയം പൊട്ടിത്തെറിക്കുകയായിരുന്നു. തൊട്ടടുത്തു തന്നെ മറ്റൊരു ചാവേര്‍ പൊട്ടിത്തെറിച്ചു കൊല്ലപ്പെട്ടു. ഇതില്‍ നിരവധി പേര്‍ക്ക് പരുക്കേറ്റു.
ആക്രമണത്തില്‍ ആരും ഉത്തരവാദിത്തം ഏറ്റെടുത്തിട്ടില്ല. ബോകോ ഹറം ഗ്രാമങ്ങളില്‍നിന്നു വ്യാപകമായി സ്ത്രീകളെ തട്ടിക്കൊണ്ടുപോയി ചാവേറുകളാക്കുന്നതായി നേരത്തെ റിപ്പോര്‍ട്ടുണ്ടായിരുന്നു.