സുല്‍ത്താന്‍ ബത്തേരി: 47ാമത് സംസ്ഥാന സീനിയര്‍ വോളി ബോള്‍ ചാംപ്യഷിപ്പില്‍ വനിതാ വിഭാഗത്തില്‍ വയനാടിനും എറണാകുളത്തിനും ജയം. ഇന്നലെ രാവിലെ നടന്ന മത്സരത്തില്‍ മലപ്പുറത്തിനെ നേരിട്ട മൂന്ന് സെറ്റുകള്‍ക്കാണ് വയനാട് പരാജയപ്പെടുത്തിയത്. സ്‌കോര്‍: 25-19, 25-16, 25-23. അഞ്ച് സെറ്റിലേക്ക് നീണ്ട രണ്ടാം മത്സരത്തില്‍ കോട്ടയത്തിന് മുന്നില്‍ ആദ്യ രണ്ടു സെറ്റുകള്‍ കൈവിട്ട എറണാകുളം അവസാന മൂന്ന് സെറ്റുകള്‍ നേടിയാണ് വിജയം കൈപിടിയിലൊതുക്കിയത്.
വൈകിട്ട് നടന്ന കണ്ണൂര്‍-തൃശൂര്‍ മത്സരത്തില്‍ നേരിട്ടുള്ള സെറ്റുകള്‍ക്ക് കണ്ണൂര്‍ തൃശൂരിനെ പരാജപ്പെടുത്തി. സ്‌കോര്‍- 25-20, 25-13, 25-16. രണ്ടാം മത്സരത്തില്‍ ആലപ്പുഴയെ നേരിട്ടുള്ള സെറ്റുകള്‍ കീഴടക്കി തിരുവനന്തപുരം ക്വാര്‍ട്ടര്‍ ഫൈനലിലേക്ക് കടന്നു. നാളെ വൈകിട്ട് നടക്കുന്ന വനിതാ വിഭാഗം ക്വാര്‍ട്ടര്‍ ഫൈനല്‍ മത്സരങ്ങളില്‍ തിരുവനന്തപുരം തൃശൂരിനേയും വയനാട് ആലപ്പുഴയേയും നേരിടും. രാവിലെ നടക്കുന്ന പുരുഷ വിഭാഗം ലീഗ് മത്സരത്തില്‍ കോട്ടയം പത്തനംതിട്ടയേയും കാസര്‍ക്കോട് തിരുവനന്തപുരത്തേയും നേരിടും.