ആലക്കോട്: പ്രീഫാബ് സംവിധാനത്തിലുള്ള ജില്ലയിലെ ആദ്യത്തെ വൈദ്യുതി സെക്ഷന്‍ ഓഫിസ് ആലക്കോട് ഒരുങ്ങുന്നു. തിരുവനന്തപുരത്തു നടന്ന ദേശീയ ഗെയിംസ് വില്ലേജില്‍ ഒരുക്കിയ കെട്ടിട ഭാഗങ്ങള്‍ ഉപയോഗിച്ചാണ് ഓഫിസിന്റെ നിര്‍മാണ പ്രവര്‍ത്തികള്‍ പുരോഗമിക്കുന്നത്. വര്‍ഷങ്ങളായി പതിനായിരക്കണക്കിനു രൂപ വാടക നല്‍കിയാണ് ആലക്കോട് ബസ് സ്റ്റാന്‍ഡിനു സമീപത്തെ സ്വകാര്യ വ്യക്തിയുടെ കെട്ടിടത്തില്‍ ഓഫിസ് പ്രവര്‍ത്തിക്കുന്നത്.
എന്നാല്‍ നിലവിലുള്ള വാടകയുടെ മൂന്നിരട്ടി വര്‍ധനവ് ആവശ്യപ്പെട്ട് കെട്ടിടമുടമ കോടതിയെ സമീപിച്ചതോടെയാണ് സ്വന്തം സ്ഥലത്തേക്ക് ഓഫിസ് മാറ്റി സ്ഥാപിക്കാന്‍ വൈദ്യുതി വകുപ്പ് അധികൃതര്‍ തീരുമാനിച്ചത്. അരങ്ങത്ത് പ്രവര്‍ത്തിക്കുന്ന 110 കെ.വി സബ് സ്റ്റേഷന്‍ സ്ഥിതിചെയ്യുന്ന സ്ഥലത്താണ് ആധുനിക രീതിയിലുള്ള കെട്ടിടം ഉയരുന്നത്. ചുമരിന്റെയും മേല്‍ക്കൂരയുടെയും നിര്‍മാണപ്രവര്‍ത്തികള്‍ ഏതാണ്ടു പൂര്‍ത്തിയായി.
തറയോടു പതിക്കുന്ന പ്രവൃത്തിയും വയറിംഗ് ജോലികളും നടന്നു വരികയാണ്. മാസങ്ങള്‍ക്കുള്ളില്‍ തന്നെ ഓഫിസ് പൊതുജനങ്ങള്‍ക്കായി തുറന്നു കൊടുക്കാന്‍ കഴിയുമെന്നാണ് അധികൃതരുടെ വിശ്വാസം.
ആലക്കോട് പഞ്ചായത്ത് ഓഫിസിനു സമീപത്താണ് പുതിയ ഓഫിസ് ഉയരുന്നത് എന്നതും പൊതുജനങ്ങള്‍ക്ക് ഏറെ പ്രയോജനകരമാണ്.