അഹമ്മദാബാദ്: അശ്ലീല സി.ഡി നിര്‍മാണത്തിന്റെ തിരക്കുകള്‍ക്കിടെ ബി.ജെ.പി ഗുജറാത്തില്‍ പ്രകടന പത്രിക പോലും തയ്യാറാക്കാന്‍ മറന്നെന്ന് ഹാര്‍ദ്ദിക് പട്ടേല്‍. ഗുജറാത്തിലെ തെരഞ്ഞെടുപ്പിന്റെ ഒന്നാം ഘട്ടം നാളെ ആരംഭിക്കാനിരിക്കെയാണ് കടുത്ത പരിഹാസവുമായി പാടിദാര്‍ നേതാവ് ഹര്‍ദിക് പട്ടേല്‍ രംഗത്തെത്തിയിരിക്കുന്നത്.

ട്വിറ്റര്‍ വഴിയാണ് യുവനേതാവിന്റെ പരിഹാസം. നേരത്തെ ഹാര്‍ദിക് പട്ടേലുമായി സാമ്യമുള്ളയാള്‍ ഉള്‍പ്പെട്ട ലൈംഗിക സി.ഡി പുറത്തിറക്കിയിരുന്നു. പട്ടേലിനെതിരെയുള്ള സംഭവത്തെ സൂചിപ്പിച്ചാണ് ഹാര്‍ദിക്കിന്റെ പരിഹാസം. ഇതിന് പിന്നില്‍ ബി.ജെ.പി ആണെന്നായിരുന്നു അവരുടെ ആരോപണം.

നേരത്തേ നിയുക്ത കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയും ഈ വിഷയത്തില്‍ വിമര്‍ശനവുമായി രംഗത്തെത്തിയിരുന്നു. പ്രകടന പത്രിക പുറത്തിറക്കാതെ ഗുജറാത്തിലെ ജനങ്ങളെ അവഹേളിക്കുകയാണ് ബി.ജെ.പി എന്ന് രാഹുല്‍ ട്വീറ്റ് ചെയ്തു.

ബി.ജെ.പി നേരത്തേ തിരഞ്ഞെടുപ്പ് ദര്‍ശന രേഖ പുറത്തിറക്കിയിരുന്നു. എന്നാല്‍ പതിവു പ്രകടനപത്രികയുടെ രൂപത്തിലായിരുന്നില്ല അത്.