കോഴിക്കോട്: ഐ ലീഗ് ഫുട്‌ബോളില്‍ ഗോകുലം കേരള എഫ്.സിയുടെ രണ്ടാം ഹോം മാച്ച് ഇന്ന് രണ്ടിന് കോര്‍പറേഷന്‍ സ്റ്റേഡിയത്തില്‍. മണിപ്പൂരില്‍ നിന്നുള്ള നെരോക്ക എഫ്. സിയുമായാണ് ഗോകുലത്തിന്റെ മത്സരം. ആദ്യ മത്സരം സമനിലയിലായതിനാല്‍ സ്വന്തം കാണികള്‍ക്ക് മുന്നില്‍ വിജയം മാത്രം ലക്ഷ്യം വച്ചാണ് ഗോകുലം ഇറങ്ങുന്നത്. എന്നാല്‍ കഴിഞ്ഞ മത്സരത്തില്‍ ടീമിലെ രണ്ട് മുന്‍നിര താരങ്ങള്‍ക്ക് പരുക്കേറ്റത് ടീമിന് തലവേദനയാകും. രണ്ട് മത്സരം കളിച്ച ഗോകുലത്തിന് ഇതുവരെ ജയിക്കാനായിട്ടില്ല. ആദ്യ മത്സരത്തില്‍ ഷില്ലോങ് ലജോങിനെതിരേ ഒരു ഗോളിന് പരാജയപ്പെട്ടിരുന്നു. രണ്ടാമത്തെ മത്സരത്തില്‍ സ്വന്തം ഗ്രൗണ്ടില്‍ ചെന്നൈ സിറ്റി എഫ്.സിക്കെതിരേ സമനില വഴങ്ങുകയും ചെയ്തു.
ഏത് പൊസിഷനിലും കളിക്കാന്‍ സജ്ജരായ താരങ്ങള്‍ ടീമിലുള്ളതാണ് ഗോകുലത്തിന്റെ കരുത്തെന്ന് പരിശീലകന്‍ ബിനോയ് ജോര്‍ജ് പറഞ്ഞു. ഇരു ടീമുകളും മികച്ചു നില്‍കുന്നതിനാല്‍ ഇന്ന് കടുത്തൊരു മത്സരം തന്നെ ഉണ്ടാകും. മത്സരം ഉച്ചയ്ക്ക് രണ്ട് മണിക്കായത് ഇരു ടീമുകളേയും ബാധിക്കുമെന്നും ഇന്നത്തെ മത്സരത്തില്‍ വിജയം മാത്രമാണ് ലക്ഷ്യമെന്നും ബിനോയ് കൂട്ടച്ചേര്‍ത്തു. ആദ്യമായി ഐ ലീഗിനെത്തിയ നെരോക്കയ്ക്കും ഇന്ന് ശക്തമായ മത്സരം പുറത്തെടുക്കേണ്ടി വരുമെന്ന് പരിശീലകന്‍ ഗിഫ്റ്റ് റൈഹാന്‍ പറഞ്ഞു. ഐ ലീഗ് സെക്കന്‍ഡ് ഡിവിഷനില്‍ നിന്ന് ചാംപ്യന്‍മാരായി വരുന്ന ടീമായതിനാല്‍ എ ഡിവിഷനില്‍ കൂടുതല്‍ പരിചയമില്ലെങ്കിലും ആദ്യ മത്സരത്തിലെ അപാകതകളെല്ലാം തിരുത്തിയാണ് ടീം ഒരുങ്ങിയിട്ടുള്ളതെന്നും റൈഹാന്‍ വ്യക്തമാക്കി.
ആദ്യ മത്സരത്തില്‍ മിനര്‍വ പഞ്ചാബിനെതിരേ ഒരു ഗോളിന് നെരോക്ക പരാജയപ്പെട്ടിരുന്നു. രണ്ട് ദിവസം മുന്‍പെ കോഴിക്കോട്ടെത്തിയ ടീം ഉച്ചയ്ക്ക് നടക്കുന്ന മത്സരത്തിന് ഒരുങ്ങാന്‍ രണ്ട് ദിവസവും ഉച്ചയ്ക്കാണ് പരിശീലനം നടത്തിയത്. മുന്‍നിര താരങ്ങളില്ലാതെ കളത്തിലിറങ്ങുന്ന ഗോകുലത്തിന് നെരോക്കയെ പരാജയപ്പെടുത്തണമെങ്കില്‍ നന്നായി വിയര്‍പ്പൊഴുക്കേണ്ടി വരും.