തിരുവനന്തപുരം: കണ്ണൂര്‍ വിമാനത്താവളത്തിന് സുരക്ഷ ഒരുക്കാന്‍ 634 സി.ഐ.എസ്.എഫുകാരെ കേന്ദ്ര ആഭ്യന്തര മന്ത്രാലയം അനുവദിച്ചു. ഇവരെ ബ്യൂറോ ഓഫ് സിവില്‍ ഏവിയേഷന് കൈമാറി. കഴിഞ്ഞ ബുധനാഴ്ച കണ്ണൂര്‍ ഇന്റര്‍ നാഷണല്‍ എയര്‍പോര്‍ട്ട് മാനേജിങ് ഡയറക്ടര്‍ പി.ബാലകിരണ്‍ ഡല്‍ഹിയില്‍ സി.ഐ.എസ്.എഫിന്റെയും ബി.സി.എ.എസിന്റെയും ഉന്നത ഉദ്യോഗസ്ഥരുമായി ചര്‍ച്ച നടത്തിയിരുന്നു.
സി.ഐ.എസ്.എഫുകാര്‍ മൂന്ന് ഷിഫ്റ്റായാണ് എയര്‍പോര്‍ട്ടിന് സുരക്ഷ ഒരുക്കുന്നത്. ഒരു ഷിഫ്റ്റില്‍ 210 പേര്‍ ഉണ്ടാകും. എയര്‍പോര്‍ട്ടിന്റെ പൂര്‍ണ സുരക്ഷാ ചുമതല ഇവര്‍ക്കായിരിക്കും. കേരള പൊലിസിനായിരിക്കും ഇമിഗ്രേഷന്റെ ചുമതല. ഇതിനായി അഞ്ചു വര്‍ഷത്തേക്ക് ഡെപ്യൂട്ടേഷനില്‍ നിയമിക്കും. പുറത്തുള്ള ക്രമസമാധാന പാലന ചുമതല കേരള പൊലിസിനായിരിക്കും. കഴിഞ്ഞ മാസം മന്ത്രിസഭാ യോഗം ഇതിനായി മട്ടന്നൂരില്‍ പൊലിസ് സ്‌റ്റേഷന് അനുമതി നല്‍കിയിരുന്നു.