റബാത്ത്: ജറൂസലം വിഷയത്തില്‍ പശ്ചിമേഷ്യയ്ക്കും കിഴക്കന്‍ ഏഷ്യന്‍ രാജ്യങ്ങള്‍ക്കും പുറമെ ആഫ്രിക്കന്‍ രാജ്യങ്ങളിലും വന്‍ പ്രതിഷേധം. ആഫ്രിക്കന്‍ രാജ്യമായ മൊറോക്കോയിലെ വിവിധ നഗരങ്ങളില്‍ പ്രതിഷേധ പ്രകടനങ്ങളില്‍ പതിനായിരങ്ങള്‍ പങ്കെടുത്തു. ഫലസ്തീന്റെ പതാകയുമായാണു പ്രതിഷേധക്കാര്‍ പ്രകടനത്തില്‍ അണിനിരന്നത്.
തുര്‍ക്കി, ഈജിപ്ത്, പാകിസ്താന്‍, ആഭ്യന്തരയുദ്ധം തകര്‍ത്ത യമന്‍, സിറിയ എന്നിവിടങ്ങളിലും ഫലസ്തീന് ഐക്യദാര്‍ഢ്യവുമായി കഴിഞ്ഞ ദിവസവും പ്രകടനങ്ങള്‍ നടന്നു. ഈജിപ്തിലെ പ്രശസ്തമായ അല്‍ അസ്ഹര്‍ സര്‍വകലാശാലയിലെ അധ്യാപകരും വിദ്യാര്‍ഥികളും ചേര്‍ന്ന് സംയുക്ത പ്രതിഷേധം നടന്നു. കറാച്ചിയില്‍ യു.എസ് കോണ്‍സുലേറ്റിനു മുന്നില്‍ നിരവധി പേര്‍ പ്രതിഷേധം സംഘടിപ്പിച്ചു.
അധിനിവിഷ്ട ഫലസ്തീനില്‍ തുടര്‍ച്ചയായി അഞ്ചാം ദിവസവും സംഘര്‍ഷത്തില്‍ അയവില്ല. കഴിഞ്ഞ ദിവസം ഇസ്‌റാഈല്‍ സൈനികരുമായുണ്ടായ ഏറ്റുമുട്ടലില്‍ 157 പേര്‍ക്ക് പരുക്കേറ്റതായി ഫലസ്തീന്‍ റെഡ് ക്രസന്റ് റിപ്പോര്‍ട്ട് ചെയ്തു. അതിനിടെ, സമാധാന സന്ദേശവുമായി എത്തിയ ബഹ്‌റൈന്‍ പ്രതിനിധി സംഘത്തെ ഫലസ്തീനില്‍ തടഞ്ഞു. പ്രശ്‌നങ്ങള്‍ക്ക് സമാധാന പരിഹാരം കണ്ടെത്തണമെന്ന് ആവശ്യപ്പെട്ടുള്ള 25 പേരടങ്ങുന്ന മതാന്തര സംഘം ഞായറാഴ്ച ഇസ്‌റാഈല്‍ സന്ദര്‍ശിച്ചിരുന്നു. മുസ്‌ലിം, ക്രിസ്ത്യന്‍, ഹിന്ദു, സിഖ് നേതാക്കളും സംഘത്തിലുണ്ട്.
അധിനിവിഷ്ട വെസ്റ്റ് ബാങ്ക്, ജറൂസലം, ഗസ്സ, റാമല്ല എന്നിവിടങ്ങളിലാണ് ശക്തമായ ജനകീയ പ്രതിഷേധം തുടരുന്നത്. ട്രംപിന്റെ പ്രഖ്യാപനത്തെ തുടര്‍ന്നുണ്ടായ ഇസ്‌റാഈല്‍ സൈനിക നടപടികളില്‍ നാല് ഫലസ്തീനികള്‍ കൊല്ലപ്പെട്ടിട്ടുണ്ട്.
ഞായറാഴ്ച ലബനാനിലെ ബൈറൂത്തിലുള്ള യു.എസ് എംബസിക്കു മുന്നില്‍ നടന്ന പ്രതിഷേധം അക്രമാസക്തമായിരുന്നു. ഇതേതുടര്‍ന്ന് പൊലിസ് ടിയര്‍ഗ്യാസും ജലപീരങ്കിയും ഉപയോഗിച്ചു. സംഭവത്തില്‍ നിരവധി പേര്‍ക്ക് പരുക്കേല്‍ക്കുകയും ചെയ്തിട്ടുണ്ട്. ഇന്തോനേഷ്യന്‍ തലസ്ഥാനമായ ജക്കാര്‍ത്തയിലെ യു.എസ് എംബസിക്കു മുന്നിലും ഞായറാഴ്ച പതിനായിരങ്ങള്‍ ട്രംപിന്റെ പ്രഖ്യാപനത്തില്‍ പ്രതിഷേധിച്ച് പ്രകടനം നടത്തി.