ലണ്ടന്‍: ഇംഗ്ലീഷ് പ്രീമിയര്‍ ലീഗ് പോരാട്ടത്തില്‍ നിലവിലെ ചാംപ്യന്‍മാരായ ചെല്‍സിക്ക് വിജയം. കഴിഞ്ഞ ദിവസം വെസ്റ്റ് ഹാം യുനൈറ്റഡിനോട് അട്ടിമറി തോല്‍വി നേരിട്ട് എവേ പോരാട്ടത്തില്‍ ഹഡ്ഡേഴ്‌സ്ഫീല്‍ഡ് ടൗണിനെ നേരിട്ട ചെല്‍സി ഒന്നിനെതിരേ മൂന്ന് ഗോളുകള്‍ക്കാണ് വിജയിച്ചത്. വിജയികള്‍ക്കായി 23ാം മിനുട്ടില്‍ ബകയോകോ, 43ാം മിനുട്ടില്‍ വില്ല്യന്‍, 50ാം മിനുട്ടില്‍ പെഡ്രോ എന്നിവര്‍ വല ചലിപ്പിച്ചു. ജയത്തോടെ ചെല്‍സി 35 പോയിന്റുമായി പട്ടികയില്‍ മൂന്നാം സ്ഥാനത്തേക്ക് കയറി. മറ്റ് മത്സരങ്ങളില്‍ ബേണ്‍ലി സ്വന്തം തട്ടകത്തില്‍ മറുപടിയില്ലാത്ത ഒറ്റ ഗോളിന് സ്റ്റോക് സിറ്റിയേയും ക്രിസ്റ്റല്‍ പാലസ് 2-1ന് വാട്‌ഫോര്‍ഡിനേയും വീഴ്ത്തി.
സ്റ്റോജര്‍ക്ക് വിജയത്തുടക്കം
മ്യൂണിക്ക്: ഒന്‍പത് മത്സരങ്ങളിലെ വിജയമില്ലാത്ത യാത്രയ്ക്ക് ബൊറൂസിയ ഡോര്‍ട്മുണ്ട് വിരാമമിട്ടു. പുതിയ പരിശീലകനായി ചുമതലയേറ്റ പീറ്റര്‍ സ്റ്റോജര്‍ക്ക് വിജയത്തോടെ തുടക്കമിടാനും സാധിച്ചു.
ജര്‍മന്‍ ബുണ്ടസ് ലീഗയിലെ എവേ പോരാട്ടത്തില്‍ മെയ്ന്‍സിനെ മറുപടിയില്ലാത്ത രണ്ട് ഗോളുകള്‍ക്കാണ് ഡോര്‍ട്മുണ്ട് വീഴ്ത്തിയത്. പപസ്റ്റതോപൗലസ്, ഷിന്‍ജി കഗാവ എന്നിവരാണ് ബൊറൂസിയക്കായി ഗോളുകള്‍ നേടിയത്.
മറ്റ് മത്സരങ്ങളില്‍ ഫ്രാങ്ക്ഫര്‍ട് 2-1ന് ഹാംബര്‍ഗറിനേയും ഫ്രീബര്‍ഗ് 1-0ത്തിന് ബൊറൂസിയ മോണ്‍ചെന്‍ഗ്ലെഡ്ബാചിനേയും വീഴ്ത്തി. നേരത്തെ പോയിന്റ് പട്ടികയില്‍ രണ്ടാം സ്ഥാനത്തുള്ള ലെയ്പ്‌സിഗിനെ വോള്‍വ്‌സ്ബര്‍ഗ് 1-1ന് സമനിലയില്‍ പിടിച്ചിരുന്നു.

ആദ്യ ജയം നേടി ഐസ്വാള്‍
ഐസ്വാള്‍: ഐ ലീഗില്‍ നിലവിലെ ചാംപ്യന്‍മാരായ ഐസ്വാള്‍ ആദ്യ വിജയം സ്വന്തമാക്കി. സ്വന്തം തട്ടകത്തില്‍ അവര്‍ മറുപടിയില്ലാത്ത ഒറ്റ ഗോളിന് ചര്‍ച്ചില്‍ ബ്രദേഴ്‌സിനെ വീഴ്ത്തി. സീസണില്‍ ചര്‍ച്ചില്‍ നേരിടുന്ന തുടര്‍ച്ചയായ മൂന്നാം പരാജയമാണിത്. അവസാന നിമിഷത്തില്‍ കൊബയാഷി നേടിയ ഗോളാണ് ഐസ്വാളിന്റെ വിജയമുറപ്പാക്കിയത്.