റിയാദ്: രഹസ്യവിവരം ലഭിച്ചതിന്റെ അടിസ്ഥാനത്തില്‍ നടത്തിയ രാജ്യത്തേക്ക് കടത്താന്‍ ശ്രമിക്കുകയായിരുന്ന രണ്ടു കണ്ടെയ്‌നര്‍ മയക്കുമരുന്ന് ഗുളികകള്‍ പിടികൂടി. സഊദി ആന്റി ഡ്രഗ്‌സ് ജനറല്‍ ഡയറക്ടറേറ്റ് ഡിപ്പാര്‍ട്ട്‌മെന്റിന്റെ സഹായത്തോടെയാണ് 1.5 മില്ല്യന്‍ മയക്കുമരുന്ന് ഗുളികകള്‍ കുവൈത്ത് സുരക്ഷാസേന അതിര്‍ത്തിയില്‍ വെച്ച് പിടികൂടിയത്. മറ്റു പല വസ്തുക്കളുടെ ഇടയില്‍ കണ്ടെയ്‌നറില്‍ മയക്കുമരുന്ന് ഗുളികകള്‍ കടത്തുന്നുണ്ടെന്ന രഹസ്യ വിവരത്തിന്റെ അടിസ്ഥാനത്തിലാണ് വാഹനം പിടി കൂടിയത്.

ഉക്രയ്‌നില്‍ നിന്നും രാജ്യത്തേക്ക് കടത്താനുള്ള ശ്രമമാണ് അധികൃതര്‍ പൊളിച്ചത്. ഏകദേശം 3 മില്ല്യന്‍ കുവൈത്ത് ദിനാര്‍ വിലമതിക്കുന്ന ഗുളികകളാണ് പിടികൂടിയത്. കുവൈത്തിലെ അല്‍ ശുവൈക് തുറമുഖം വഴി കടത്തുകയായിരുന്ന കണ്ടെയ്‌നര്‍ സിറിയന്‍ സ്വദേശിയാണ് സ്വീകരിച്ചത്. സഊദി പൗരന്റെ പേരില്‍ അദേഹം കണ്ടെയ്‌നര്‍ സ്വീകരിക്കുന്നതിനിടെ ഇയാളെ പൊലിസ് പിടികൂടുകയായിരുന്നു. ഉക്രെയ്‌നില്‍ നിന്നും സാധനങ്ങള്‍ കടത്തുന്നതിന് കള്ളരേഖകള്‍ നിര്‍മിച്ചാണ് സംഘം ഇതിനു മുതിര്‍ന്നത് .പിടി കൂടിയ ഇവരെ കണ്ടെയ്‌നറുകള്‍ക്കൊപ്പം തുടര്‍ നടപടികള്‍ക്കായി അധികൃതര്‍ അറസ്റ്റ് ചെയ്തിട്ടുണ്ട്.