ഹൈദരാബാദ്: വിജയ് മര്‍ച്ചന്റ് ട്രോഫി അണ്ടര്‍ 16 ക്രിക്കറ്റില്‍ കേരളത്തിന് തകര്‍പ്പന്‍ ജയം. ഗോവയെ ഇന്നിങ്‌സിനും 139 റണ്‍സിനും പരാജയപ്പെടുത്തിയാണ് കേരളം വിജയം പിടിച്ചത്. ജയത്തോടെ കേരളത്തിന് ഏഴ് പോയിന്റുകളുമായി. കേരളം ഒന്നാം ഇന്നിങ്‌സില്‍ എട്ട് വിക്കറ്റ് നഷ്ടത്തില്‍ 446 റണ്‍സെടുത്ത് ഡിക്ലയര്‍ ചെയ്തു. ഗോവയുടെ ഒന്നാം ഇന്നിങ്‌സ് 130 റണ്‍സില്‍ അവസാനിപ്പിച്ച് അവരെ ഫോളോ ഓണിന് വിട്ട കേരളം ഗോവയുടെ രണ്ടാം ഇന്നിങ്‌സ് പോരാട്ടം 178 റണ്‍സില്‍ അവസാനിപ്പിച്ചാണ് മിന്നും ജയം സ്വന്തമാക്കിയത്.
അഞ്ച് വിക്കറ്റുകള്‍ വീഴ്ത്തി ഗോവയുടെ ഒന്നാം ഇന്നിങ്‌സ് തകര്‍ത്ത ജസീര്‍ സി.എന്‍ രണ്ടാം ഇന്നിങ്‌സില്‍ നാല് വിക്കറ്റ് വീഴ്ത്തി മുന്നില്‍ മികച്ച പ്രകടനം ആവര്‍ത്തിച്ചു.
രണ്ടിന്നിങ്‌സിലുമായി ഒന്‍പത് വിക്കറ്റ് പിഴുത താരത്തിന്റെ ഉജ്ജ്വല മികവാണ് ഗോവയുടെ തകര്‍ച്ചയ്ക്ക് ആക്കം കൂട്ടിയത്.
മൂന്ന് വീതം വിക്കറ്റുകള്‍ വീഴ്ത്തി അഖിന്‍, അക്ഷയ് എന്നിവര്‍ രണ്ടാം ഇന്നിങ്‌സില്‍ ജസീറിന് മികച്ച പിന്തുണ നല്‍കി. ഗോവന്‍ നിരയില്‍ പല്‍കര്‍ (63), കുശാല്‍ ഹട്ടന്‍ഗഡി (69) എന്നിവരൊഴികെ മറ്റൊരു താരവും പിടിച്ചു നിന്നില്ല. നാല് ഗോവന്‍ താരങ്ങള്‍ സംപൂജ്യരായി കൂടാരം കയറി.
നേരത്തെ ആല്‍ബിന്‍ ബിനു (122), ക്യാപ്റ്റന്‍ വരുണ്‍ നായനാര്‍ (88), അക്ഷയ് ടി.കെ (54) എന്നിവരുടെ മികവിലാണ് കേരളം ഒന്നാം ഇന്നിങ്‌സില്‍ മികച്ച സ്‌കോര്‍ സ്വന്തമാക്കിയത്.