മനാമ: ബഹ്‌റൈന്‍ ദേശീയ ദിനാഘോഷ പരിപാടികള്‍ക്കു സമാപനം. ദിവസങ്ങള്‍ക്കു മുന്‍പ് ആരംഭിച്ച 46-ാമത് ദേശീയദിനാഘോഷ പരിപാടികളാണ് കഴിഞ്ഞ ദിവസം ഔദ്യോഗികമായി സമാപിച്ചത്. 1783ല്‍ അഹ്മദ് അല്‍ ഫാത്തിഹ് സ്ഥാപിച്ച ബഹ്‌റൈന്‍ ഭരണകൂടം ഐക്യരാഷ്ട്രസഭയില്‍ പൂര്‍ണ അംഗമായി തിരഞ്ഞെടുക്കപ്പെട്ടതിന്റെ 46-ാം വാര്‍ഷികാഘോഷവും ഹമദ് രാജാവിന്റെ കിരീടധാരണത്തിന്റെ 18-ാം വാര്‍ഷികവുമാണ് ഇത്തവണ ആഘോഷിച്ചത്.അല്‍ സാഖീര്‍ കൊട്ടാരത്തില്‍ നടന്ന ആഘോഷ പരിപാടികള്‍ക്ക് രാജാവ് ഹമദ് ബിന്‍ ഈസ ആല്‍ ഖലീഫ നേതൃത്വം നല്‍കി. കാലാള്‍പ്പട 21 റൗണ്ട് വെടിമുഴക്കി ഹമദ് രാജാവിനെ വരവേറ്റു. ചടങ്ങില്‍ മലേഷ്യന്‍ പ്രധാനമന്ത്രി നജീബ് അബ്ദുല്‍ റസാഖ് മുഖ്യാതിഥിയായി പങ്കെടുത്തു.പ്രധാനമന്ത്രി ഖലീഫ ബിന്‍ സല്‍മാന്‍ ആല്‍ ഖലീഫ, കിരീടാവകാശിയും ഡെപ്യൂട്ടി സുപ്രിം കമാന്‍ഡറും ഒന്നാം ഉപപ്രധാനമന്ത്രിയുമായ സല്‍മാന്‍ ബിന്‍ ഹമദ് ആല്‍ ഖലീഫ രാജകുമാരന്‍ എന്നിവര്‍ ചടങ്ങില്‍ സംബന്ധിച്ചു.