ഇസ്‌ലാമാബാദ്: മുംബൈ ഭീകരാക്രമണ സൂത്രധാരന്‍ ഹാഫിസ് സഈദിനെയും പാകിസ്താനിലെ ഭീകരസംഘങ്ങളെയും വെള്ളപൂശി വീണ്ടും മുന്‍ പ്രസിഡന്റ് പര്‍വേസ് മുശറഫ്.
ഭീകരസംഘടനകളായ ലഷ്‌കറെ ത്വയ്ബയും ജമാഅത്തുദ്ദഅ്‌വയും ഹാഫിസ് സഈദും ദേശസ്‌നേഹികളാണെന്നാണ് മുശറഫിന്റെ പുതിയ പ്രസ്താവന. പാകിസ്താന്റെ സുരക്ഷയ്ക്കും സംരക്ഷണത്തിനുമായി ഈ സംഘടനകളുമായി സഖ്യത്തിനു തയാറാണെന്നും അദ്ദേഹം അറിയിച്ചു.
ലഷ്‌കറും ജമാഅത്തും ദേശസ്‌നേഹികളുടെ സംഘടനകളാണ്. അവരാണ് കൂടുതല്‍ ദേശസ്‌നേഹികള്‍. കശ്മിരിലെ പാകിസ്താനികള്‍ക്കു വേണ്ടി സ്വന്തം ജീവന്‍ പോലും ബലിയര്‍പ്പിച്ചവരാണ് അവര്‍.
ഈ പാര്‍ട്ടികള്‍ ഇതുവരെ എന്നെ സമീപിച്ചിട്ടില്ല. എന്നാല്‍, എന്റെ പാര്‍ട്ടിയുമായി ചേര്‍ന്ന് സഖ്യം രൂപീകരിക്കാന്‍ അവര്‍ തയാറാണെങ്കില്‍ എനിക്ക് ഒരു എതിര്‍പ്പുമില്ല. ജനപിന്തുണയുള്ള സംഘടനകളാണ് അവര്‍. അതിനാല്‍ അവര്‍ രാഷ്ട്രീയ പാര്‍ട്ടി രൂപീകരിച്ചാല്‍ ആര്‍ക്കും എതിര്‍ക്കാനാകില്ല-മുശറഫ് പറഞ്ഞു.
ലഷ്‌കറിന്റെയും ഹാഫിസ് സഈദിന്റെയും ഏറ്റവും വലിയ സഹായിയായിരുന്നു താനെന്നു കഴിഞ്ഞയാഴ്ച മുശറഫ് വെളിപ്പെടുത്തിയിരുന്നു.
സഈദുമായി ചേര്‍ന്ന് സഖ്യം രൂപീകരിച്ച് അടുത്ത വര്‍ഷം നടക്കുന്ന പ്രസിഡന്റ് തെരഞ്ഞെടുപ്പിനെ നേരിടുമെന്നും നിലവില്‍ ദുബൈയില്‍ കഴിയുന്ന 74കാരനായ മുശറഫ് വ്യക്തമാക്കിയിട്ടുണ്ട്.