റിയാദ്:  ഗള്‍ഫ് രാജ്യങ്ങളിലെ ഇന്ത്യന്‍ സമൂഹം സ്വാതന്ത്ര്യദിനം സമുചിതമായി ആഘോഷിച്ചു. വിവിധ ഗള്‍ഫ് നാടുകളിലെ എംബസികള്‍ക്കും നയതന്ത്ര കാര്യാലയങ്ങള്‍ക്കും പുറമെ സാംസ്‌കാരിക, മത  സംഘടനകളുടെ നേതൃത്വത്തിലും വിപുലമായ ആഘോഷ പരിപാടികളാണ് സംഘടിപ്പിച്ചത്.
   
 സഊദിയില്‍ റിയാദിലെ ഇന്ത്യന്‍ എംബസി ആസ്ഥാനത്ത് നടന്ന സ്വാതന്ത്ര്യദിന ആഘോഷ ചടങ്ങില്‍ ഇന്ത്യന്‍ അംബാസിഡര്‍ അഹ് മദ് ജാവേദ് പതാക ഉയര്‍ത്തുകയും സ്വാതന്ത്ര്യദിന സന്ദേശം നല്‍കുകയും ചെയ്തു. ഇന്ത്യന്‍ പ്രസിഡന്റിന്റെ സന്ദേശം അദ്ദേഹം സദസിനു കൈമാറി. വിവിധ തലങ്ങളില്‍ നിന്നും 800 ഓളം ആളുകളാണ് എംബസി ആഘോഷത്തില്‍ പങ്കുത്തത്.
 
ജിദ്ദയിലെ ഇന്ത്യന്‍ കോണ്‍സുലേറ്റില്‍ നടന്ന ചടങ്ങില്‍ കോണ്‍സുല്‍ ജനറല്‍ നൂര്‍ റഹ്മാന്‍ ശൈഖ് ഇന്ത്യന്‍ പതാക ഉയര്‍ത്തുകയും സ്വാതന്ത്യ ദിന സന്ദേശവും  ഇന്ത്യന്‍ പ്രസിഡന്റിന്റെ സന്ദേശം കൈമാറുകയും ചെയ്തു.

ഇന്ത്യന്‍ ഇന്റര്‍ നാഷണല്‍ സ്‌കൂളിലെ വിദ്യാര്‍ഥികളടക്കം നിരവധി പേര്‍ ചടങ്ങിന് സാക്ഷികളായെത്തി.
   
 യു.എ.ഇയിലെ ഇന്ത്യന്‍ സമൂഹവും  മാതൃരാജ്യത്തിന്റെ സ്വാതന്ത്ര്യദിനം ആഘോഷിച്ചു. അബൂദബിയിലെ ഇന്ത്യന്‍ എംബസിയിലും ദുബൈയിലെ ഇന്ത്യന്‍ കോണ്‍സുലേറ്റിലും വിപുലമായ ആഘോഷപരിപാടികളാണ് അരങ്ങേറിയത്. അബൂദബിയിലെ ഇന്ത്യന്‍ എംബസിയില്‍ അംബാസഡര്‍ ടി പി സീതാറാമും, ദുബൈയിലെ ഇന്ത്യന്‍ കോണ്‍സുലേറ്റില്‍ കോണ്‍സുല്‍ ജനറല്‍ അനുരാഗ് ഭൂഷണും ദേശീയപതാക ഉയര്‍ത്തി. രാഷ്ട്രപതിയുടെ സന്ദേശം വായിച്ചു.
 
 ഖത്തറിലെ ഇന്ത്യന്‍ സമൂഹവും 70- ാം സ്വാതന്ത്ര്യദിനം സമുചിതമായി ആഘോഷിച്ചു. ഇന്ത്യന്‍ എംബസിയുടെ മേല്‍ നോട്ടത്തില്‍ ഐ സി സി യില്‍ നടന്ന പരിപാടിയില്‍ ഇന്ത്യന്‍ അംബാസഡര്‍ സജ്ഞീവ് അറോറ പതാക ഉയര്‍ത്തി.  തുടര്‍ന്ന് അദ്ധേഹം രാഷ്ട്രപതിയുടെ സ്വാതന്ത്ര്യദിന സന്ദേശം വായിച്ചു. ഇന്ത്യന്‍ കള്‍ച്ചറല്‍ സെന്ററിനു കീഴിലെ വിവിധ പ്രവാസി സംഘടനകളെ പ്രതിനിധീകരിച്ചെത്തിയ നൂറു കണക്കിന് ഇന്ത്യക്കാര്‍ ആഘോഷ പരിപാടികളില്‍ പങ്കാളികളായി .
 
ഒമാനില്‍ നടന്ന ചടങ്ങില്‍ അംബാസിഡര്‍ എച്ച് ഇന്ദ്ര മണി പാണ്ഡെ പതാക ഉയര്‍ത്തുകയും ഇന്ത്യന്‍ പ്രസിഡന്റിന്റെ സ്വതന്ത്ര്യദിന സന്ദേശം കൈമാറുകയും ചെയ്തു. ഒമാനിലെ ഇന്ത്യന്‍ കമ്മ്യൂണിറ്റിയിലെ 400 ലധികം ആളുകളാണ് പങ്കെടുത്തത്.

കുവൈറ്റില്‍ ഇന്ത്യന്‍ അംബാസഡര്‍ സുനില്‍ ജൈന്‍ പതാക ഉയര്‍ത്തുകയും ഇന്ത്യന്‍ പ്രസിഡന്റിന്റെ സ്വതന്ത്ര്യ ദിന സന്ദേശം കൈമാറുകയും ചെയ്തു.
   
സ്വാതന്ത്ര്യ ദിനം ബഹ്‌റിനിലെ വിവിധ സംഘടനകളുടെ നേതൃത്വത്തില്‍ വിപുലമായി ആഘോഷിച്ചു. ഇന്ത്യന്‍ എംബസിയുടെ ആഭിമുഖ്യത്തില്‍ സ്വാതന്ത്ര്യ ദിനാഘോഷം അദ്‌ലിയയില്‍ എംബസി അങ്കണത്തില്‍ നടന്നു. രാവിലെ ഏഴ് മണിക്ക് ഇന്ത്യന്‍! അംബാസഡര്‍! അലോക് കുമാര്‍ സിന്‍ഹ ദേശീയപതാകയുയര്‍ത്തിയശേഷം രാഷ്ട്രപതിയുടെ സ്വാതന്ത്ര്യദിനസന്ദേശം വായിച്ചു.
    
വിവിധ രാജ്യങ്ങളില്‍ ഇന്ത്യന്‍ എംബസിയെ കൂടാതെ ഇന്ത്യന്‍ സമൂഹത്തിന്റെയും മത, സാമൂഹിക, സാംസ്‌കാരിക സംഘടനകളുടെയും ആഭിമുഖ്യത്തില്‍ വിവിധ കേന്ദ്രങ്ങളില്‍ വര്‍ണ്ണാഭമായ സ്വാതന്ത്ര്യ ദിന ആഘോഷങ്ങളാണ് നടന്നത്. പലയിടത്തും ഒരാഴ്ച നീളുന്ന പരിപാടികളും സംഘടിപ്പിച്ചിട്ടുണ്ട്.