മട്ടാഞ്ചേരി: മദ്യപാനത്തിനിടെയുണ്ടായ വാക്കുതര്‍ക്കത്തിനൊടുവില്‍ സുഹൃത്തിനെ കുത്തിക്കൊലപ്പെടുത്തിയ സംഭവത്തില്‍ പ്രതി അറസ്റ്റില്‍.
നോര്‍ത്ത് മൂലങ്കുഴിയില്‍ വീരപ്പന്‍ ജോയിയെന്ന ജോയി(48)യെ കുത്തിക്കൊന്ന കേസില്‍ നോര്‍ത്ത് മൂലങ്കുഴി ജംഗ്ഷനില്‍ ജസ്റ്റിന്റെ വീട്ടില്‍ വാടകയ്ക്ക് താമസിക്കുന്ന വിനു എന്ന കെ.എ.ജോസഫി(42)നെയാണ് പൊലിസ് അറസ്റ്റ് ചെയ്തത്.ബുധനാഴ്ച രാത്രി പത്തിന് നോര്‍ത്ത് മൂലങ്കുഴി ജംഗ്ഷനിലാണ് സംഭവം.
കൊല്ലപ്പെട്ട ജോയിയും പ്രതി ജോസഫും മറ്റ് മൂന്ന് സുഹൃത്തുക്കളും ചേര്‍ന്ന് മദ്യപിക്കുന്നതിനിടെ ജോയിയും ജോസഫും തമ്മില്‍ വാക്ക് തര്‍ക്കവും തുടര്‍ന്ന് അടിപിടിയുമുണ്ടായി. പിന്നീട് അവിടെ നിന്ന് പോയ ജോസഫ് കത്തിയുമായി മടങ്ങിയെത്തി മൂലങ്കുഴി ജംഗ്ഷനില്‍ നിന്നിരുന്ന ജോയിയെ കുത്തി വീഴ്ത്തുകയായിരുന്നു. നാട്ടുകാര്‍ അറിയിച്ചതിനെ തുടര്‍ന്ന് തോപ്പുംപടി പൊലിസ് എത്തി ജോയിയെ കരുവേലിപ്പടി സര്‍ക്കാര്‍ ആശുപത്രിയിലെത്തിച്ചെങ്കിലും മരിച്ചിരുന്നു.
തുടര്‍ന്ന് പ്രദേശത്ത് സ്ഥാപിച്ചിട്ടുള്ള സി.സി ടിവി ദൃശ്യങ്ങള്‍ പൊലിസ് പരിശോധിക്കുകയും പ്രതിയെ തിരിച്ചറിയുകയും ചെയ്തു.
വീട്ടില്‍വച്ചാണ് ഇയാള്‍ പിടിയിലാവുന്നത്. കൊലപാതകത്തിനായി പ്രതി ഉപയോഗിച്ച കത്തി പൊലിസ് കണ്ടെടുത്തിട്ടുണ്ട്. സംഭവം നടന്ന് മണിക്കൂറുകള്‍ക്കകം തന്നെ പ്രതിയെ പിടികൂടാന്‍ പൊലിസിന് കഴിഞ്ഞു.
സംഘം ചേര്‍ന്നുള്ള മദ്യപാനത്തിനിടെയുണ്ടായ ചെറിയ തര്‍ക്കമാണ് കൊലപാതകത്തില്‍ കലാശിച്ചതെന്ന് പൊലിസ് പറഞ്ഞു. പ്രതിയെ ഇന്ന് കോടതിയില്‍ ഹാജരാക്കും.