മോസ്‌കോ: ഉക്രൈന് യു.എസ് ആയുധം കൈമാറുന്നതിനെതിരേ റഷ്യ.
ആയുധങ്ങളുടെ സംഭരണം കിഴക്കന്‍ ഉക്രൈനില്‍ സര്‍ക്കാറിന്ന് ആക്രമണങ്ങള്‍ നടത്താന്‍ സഹായിക്കുമെന്നും രാജ്യത്തെ സംഘര്‍ഷത്തിലേക്ക് നയിക്കുമെന്നും റഷ്യന്‍ ഉപ വിദേശകാര്യമന്ത്രി ഗ്രികറി കരാസിന്‍ പറഞ്ഞു. ഉക്രൈനിന്റെ കിഴക്കന്‍ പ്രദേശത്തുള്ള വിമതര്‍ക്ക് റഷ്യ ശക്തമായ പിന്തുണ നല്‍കുന്നുണ്ട്.
ഉക്രൈനിന്റെ പ്രതിരോധ ശക്തി വര്‍ധിപ്പിക്കാനായി ആയുധ സഹായം നല്‍കുമെന്ന് കഴിഞ്ഞ ദിവസമാണ് യു.എസ് പ്രഖ്യാപിച്ചത്.
ആയുധ കൈമാറ്റത്തിലൂടെ ഉക്രൈന്‍ സൈന്യത്തെ യുദ്ധത്തിലേക്ക് നയിക്കാനുള്ള ശ്രമമാണ് അമേരിക്ക നടത്തുന്നതെന്ന് റഷ്യന്‍ പാര്‍ലമെന്റ് സുരക്ഷാ കമ്മിറ്റി അംഗം ഫ്രാനപ്‌സ് ക്ലിന്‍സെവിച്ച് പറഞ്ഞു.
റഷ്യ പിന്തുണക്കുന്ന കിഴക്കന്‍ ഉക്രൈനിലെ വിമതരും ഉക്രൈന്‍ സര്‍ക്കാരുമായി തുടരുന്ന സംഘര്‍ഷത്തില്‍ മൂന്ന് വര്‍ഷത്തിനിടയില്‍ 10,000 പേര്‍ കൊല്ലപ്പെട്ടിട്ടുണ്ട്. റഷ്യയുടെ നേതൃത്വത്തില്‍ വിമതര്‍ക്ക് വന്‍ ആയുധങ്ങള്‍ വിതരണം ചെയ്യുന്നുണ്ടെന്നാണ് ഉക്രൈന്‍ ആരോപണം.
ഉക്രൈന്‍ വിഷയത്തില്‍ ഇടപെടുന്നതോടെയു.എസും റഷ്യയുമായുള്ള ബന്ധം കൂടുതല്‍ സങ്കീര്‍ണതയിലേക്ക് നീങ്ങും.