ന്യൂഡല്‍ഹി: മുത്വലാഖ് ബില്‍ ലോകസഭയില്‍ പാസാക്കിയതിന് പിന്നാലെ ബഹുഭാര്യത്വവും രാജ്യത്ത് നിരോധിക്കണമെന്ന ആവശ്യവുമായി വനിതാ ആക്ടിവിസ്റ്റുകള്‍. ഒരു വിഭാഗം മുസ്‌ലിം വനിതകളാണ് ബഹുഭാര്യത്വത്തിനെതിരേ പുതിയ നിയമ പോരാട്ടങ്ങള്‍ക്ക് തുടക്കമിടുന്നത്.
സുപ്രിംകോടതിയിലെ അഭിഭാഷകയായ ഫറ ഫൈസ, മുത്വലാഖിന് ഇരകളായ റിസ്‌വാന, റസിയ എന്നിവരാണ് ഇതിന് നേതൃത്വം നല്‍കുന്നത്. മുത്വലാഖ് ബില്‍ ലോക്‌സഭയില്‍ പാസാക്കിയത് പുതിയ തുടക്കമാണെന്നും ബഹുഭാര്യത്വം നിരോധിച്ചുകൊണ്ടുള്ള നിയമ നിര്‍മാണം ഉടന്‍ നടത്തണമെന്നും അവര്‍ പറഞ്ഞു.
മുത്വലാഖിനെക്കാള്‍ മോശപ്പെട്ട സമ്പ്രദായമാണ് ബഹുഭാര്യത്വം. ഇത് നിലനില്‍ക്കുന്ന കാലത്തോളം മുത്വലാഖ് നിരോധനം കൊണ്ട് മുസ്‌ലിം വനിതകളെ സംരക്ഷിക്കാന്‍ സാധ്യമല്ല. മുത്തലാഖിനെിരേ നടപടി സ്വീകരിക്കാന് 1985ലെ ശബാനു കേസിന്റെ സമയത്ത് അവസരം ലഭ്യമായെങ്കിലും അന്നത്തെ സര്‍ക്കാര്‍ ഈ സാഹചര്യം നഷ്ടപ്പെടുത്തുകയായിരുന്നുവെന്ന് ഇവര്‍ പറഞ്ഞു. മുത്വലാഖുമായി ബന്ധപ്പെട്ടുള്ള എന്‍.ഡി.എയുടെ ശ്രമങ്ങളില്‍ ഇവര്‍ തൃപ്തി അറിയിച്ചു.
ബഹുഭാര്യത്വം നിരോധിച്ചുകൊണ്ടുള്ള പുതിയ നിയമ നിര്‍മാണം നടത്തുകയാണെങ്കില്‍ മുത്വലാഖ് ചെയ്യുന്നതില്‍ നിന്ന് പുരുഷന്മാരെ തടയാന്‍ സാധിക്കുമെന്ന് ആള്‍ ഇന്ത്യ മുസ്‌ലിം വുമണ്‍ പെഴ്‌സനല്‍ ലോ ബോര്‍ഡ് (എ.ഐ.എം.ഡബ്ലു.പി.എല്‍.ബി) അഭിഭാഷക ചന്ദ്ര രാജന്‍ പറഞ്ഞു.
മുത്വലാഖ് അസാധുവാക്കണമെന്ന് വുമണ്‍ പെഴ്‌സനല്‍ ബോര്‍ഡിന്റെ ആരംഭം മുതല്‍ ആവശ്യപ്പെട്ടിരുന്നു. ശരീഅത്ത് നിയമം സര്‍ക്കാരിന്റെ നിയമത്തിന് കീ ഴിലല്ലാത്തത് വളരെ നിരാശപ്പെടുത്ത വിഷയമാണ്.
സര്‍ക്കാരിന് കീഴില്‍ ശരീഅത്ത് കൊണ്ടുവരുന്നത് വരെ ഇന്ത്യയില്‍ തെറ്റായ ആചാരങ്ങള്‍ തുടരും. പ്രായപൂര്‍ത്തിയാവാത്ത കുട്ടിയെ മാതാവിന് ലഭിക്കുമെന്നതാണ് മുത്വലാഖ് ബില്ലിലെ പ്രധാന കാര്യമെന്ന് ചന്ദ്ര രാജന്‍ പറഞ്ഞു.