കെയ്‌റോ: നഗരത്തില്‍ ക്രിസ്ത്യന്‍ പള്ളിക്കടുത്തുണ്ടായ വെടിവയ്പ്പില്‍ ഒന്‍പതു മരണം. കെയ്‌റോയിലെ ഹെല്‍വാനിലുള്ള സെന്റ് മിനാ കോപ്റ്റിക് ചര്‍ച്ചിലാണ് രണ്ടു ഭീകരര്‍ ചേര്‍ന്ന് ആക്രമണം നടത്തിയത്.
ഐ.എസ് ആമാഖ് വെബ്‌സൈറ്റിലൂടെ സംഭവത്തിന്റെ ഉത്തരവാദിത്തം ഏറ്റെടുത്തിട്ടുണ്ട്. ഇബ്‌റാഹീം ഇസ്മാഈല്‍ മുസ്തഫ എന്നു പേരുള്ള 33കാരനാണ് ആക്രമണം നടത്തിയതെന്ന് ഈജിപ്ത് ആഭ്യന്തര മന്ത്രാലയം ഔദ്യോഗിക ഫെയ്ബുക്ക് പേജിലൂടെ അറിയിച്ചു. ഇതിനു മുന്‍പും വിവിധ ഭീകരകേസുകളില്‍ പ്രതിയാണ് ഇയാളെന്ന് കുറിപ്പില്‍ പറയുന്നു.
ആക്രമണത്തില്‍ സംശയിക്കുന്ന ഒരാളെ പൊലിസ് പിടികൂടിയിട്ടുണ്ട്. ഇയാളുടെ പക്കല്‍ മെഷിന്‍ ഗണ്ണും ബോംബുമുണ്ടായിരുന്നതായി ആഭ്യന്തര മന്ത്രാലയം അറിയിച്ചു. പള്ളിയില്‍ ആക്രമണം നടത്താനായിരുന്നു ഭീകരരുടെ പദ്ധതിയെന്ന് പൊലിസ് പറഞ്ഞു. മറ്റൊരു ഭീകരനെ പൊലിസ് വെടിവച്ചുകൊന്നിട്ടുണ്ട്.
ആഴ്ചകള്‍ക്കു മുന്‍പ് സീനായിലെ സുന്നി പള്ളിയില്‍ നടന്ന ഭീകരാക്രമണത്തില്‍ 300ലേറെ പേര്‍ കൊല്ലപ്പെട്ടിരുന്നു.