ന്യൂഡല്‍ഹി: ജപ്പാനില്‍ ടോകിയോ വിമാനത്താവളത്തിന്റെ റണ്‍വേയില്‍ വിമാനം കത്തിയമര്‍ന്നു. ജപ്പാന്‍ എയര്‍ലൈന്‍സിന്റെ വിമാനം പൂര്‍ണ്ണമായും കത്തിയമര്‍ന്നു. കോസ്റ്റ് ഗാര്‍ഡിന്റെ വിമാനത്തിലുണ്ടായിരുന്ന അഞ്ച് പേര്‍ മരിച്ചു. യാത്രാ വിമാനത്തിലുണ്ടായിരുന്ന യാത്രക്കാരും ജീവനക്കാരും അടക്കം 379 പേരേയും സുരക്ഷിതമായി പുറത്തെത്തിച്ചുവെന്ന് വിമാനക്കമ്പനി അറിയിച്ചു.

ജപ്പാന്‍ എയര്‍ലൈന്‍സിന്റെ ജെഎഎല്‍ 516 വിമാനം ലാന്‍ഡ് ചെയ്തതിന് പിന്നാലെ കോസ്റ്റ്ഗാര്‍ഡിന്റെ വിമാനവുമായി കൂട്ടിയിടിച്ചതാണ് തീപിടിക്കാന്‍ കാരണമെന്ന് അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്യുന്നു.വിമാനത്തിലുണ്ടായിരുന്ന 367 യാത്രക്കാരെയും 12 ജീവനക്കാരെയും രക്ഷപ്പെടുത്തിയതായി വാര്‍ത്താ ഏജന്‍സികള്‍ റിപ്പോര്‍ട്ട് ചെയ്യുന്നു.

ജപ്പാനില്‍ നിന്ന് മാധ്യമങ്ങള്‍ പുറത്തുവിട്ട ദൃശ്യങ്ങളില്‍ വിമാനത്തിനകത്ത് ആദ്യം തീപിടിക്കുന്നതും പെട്ടെന്ന് ഒരു തീഗോളമായി മാറുന്നതും കാണാം. മറ്റൊരു വിഡിയോയില്‍ വിമാനത്തില്‍ നിന്ന് പുകയും തീയും ഉയരുമ്പോള്‍ ഒന്നിലധികം ഫയര്‍ ട്രക്കുകള്‍ തീ അണക്കുന്നതും കാണാം.

ജപ്പാനില്‍ വിമാനം കത്തിയമര്‍ന്നു; അഞ്ച് പേര്‍ മരിച്ചു, 379 പേരെ രക്ഷിച്ചു