മുഖദ്ദസ് സന്ദേശ യാത്ര സമാപനം വ്യാഴാഴ്ച മലപ്പുറത്ത്

മലപ്പുറം: സത്യം, സ്വത്വം, സമർപ്പണം എന്ന പ്രമേയത്തിൽ എസ്.കെ.എസ്.എസ്.എഫ് 35 ാം വാർഷിക സമ്മേളന ഭാഗമായി നടക്കുന്ന മുഖദ്ദസ് സന്ദേശ യാത്ര 11 ന് വ്യാഴാഴ്ച വൈകീട്ട് മലപ്പുറത്ത് സമാപിക്കും. പാണക്കാട് സയ്യിദ് ഹമീദലി ശിഹാബ് തങ്ങൾ സയ്യിദ് ഫഖ്റുദ്ദീൻ ഹസനി തങ്ങൾ എന്നിവരുടെ നേതൃത്വത്തിൽ യഥാക്രമം മംഗലാപുരം, തിരുവനന്തപുരം എന്നിവിടങ്ങളിൽ നിന ന്നാരംഭിച്ച ഇരു യാത്രകളും മലപ്പുറത്ത് സംഗമിക്കും. വൈകീട്ട് അഞ്ചിന് മലപ്പുറം കുന്നുമ്മലിൽ സമാപന റാലിയും സമ്മേളനവും നടക്കും.

സമാപന സമ്മേളനം സമസ്ത കേരളാ ജംഇയ്യത്തുൽ ഉലമാ പ്രസിഡന്റ് സയ്യിദ് മുഹമ്മദ് ജിഫ് രി മുത്തുക്കോയ തങ്ങൾ ഉദ്ഘാടനം ചെയ്യും. പാണക്കാട് സയ്യിദ് അബ്ബാസലി ശിഹാബ് തങ്ങൾ അധ്യക്ഷരാകും. അബ്ദുൽ ഹമീദ് ഫൈസി അമ്പലക്കടവ്, സത്താർ പന്തലൂർ തുടങ്ങിയവർ സംസാരിക്കും.

പാണക്കാട് സയ്യിദ് സാദിഖലി ശിഹാബ് തങ്ങൾ പതാക കൈമാറി
ഈ മാസം ഒന്നിനാണ് മുഖദ്ദസ് സന്ദേശ യാത്ര ആരംഭിച്ചത്. വിവിധ ജില്ലകളിൽ ഉന്നത മത സ്ഥാപനങ്ങളിൽ പര്യടനം നടത്തിയ യാത്രയുടെ ഭാഗമായി വിദ്യാഥികൾക്ക് ടാലന്റ് ഹണ്ട് സംഘടിപ്പിച്ചു വരുന്നു. സയ്യിദ് ഹാശിറലി ശിഹാബ് തങ്ങൾ, റശീദ് ഫൈസി വെള്ളായിക്കോട് എന്നിവർ ഉപനായകരായ ഇരു ജാഥകളിലായി സംസ്ഥാന, ജില്ലാ ഭാരവാഹികൾ അനുഗമിക്കുന്നു. സ്ഥാപന മാനേജ്മെന്റ്, അധ്യാപകർ, വിദ്യാർഥികൾ എന്നിവരുടെ നേതൃത്വത്തിൽ ഊഷ്മള സ്വീകരണമാണ് നൽകി വരുന്നത്. വ്യാഴാഴ്ച മലപ്പുറത്ത് സമാപന സമ്മേളന പരിപാടിയുടെ ഒരുക്കങ്ങൾ പൂർത്തി വരുന്നതായി സംഘാടക സമിതി ചെയർമാൻ സയ്യിദ് അബ്ദു റശീദലി ശിഹാബ് തങ്ങൾ, ജനറൽ കൺവീനർ സയ്യിദ് നിയാസലി ശിഹാബ് തങ്ങൾ, ട്രഷറർ സയ്യിദ് സാബിഖലി ശിഹാബ് തങ്ങൾ എന്നിവർ അറിയിച്ചു.