ഷാർജ:പതിമൂന്നാമത് ഷാർജ ലൈറ്റ് ഫെസ്റ്റിവൽ 2024 ഫെബ്രുവരി 7 ന് മുതൽ ആരംഭിക്കും. ഷാർജ കോമേഴ്‌സ് ആൻഡ് ടൂറിസം ഡവലപ്മെന്റ് അതോറിറ്റി (SCTDA) സംഘടിപ്പിക്കുന്ന ഈ വർണോത്സവം ഇത്തവണ ഷാർജയിൽ 12 ഇടങ്ങളിലായാണ് ഒരുക്കുന്നത്.

2024 ഫെബ്രുവരി 7 മുതൽ 18 വരെയാണ് ഇത്തവണത്തെ ഷാർജ ലൈറ്റ് ഫെസ്റ്റിവൽ സംഘടിപ്പിക്കുന്നത്. ഷാർജ ലൈറ്റ് ഫെസ്റ്റിവലിന്റെ ഭാഗമായുള്ള ലൈറ്റ് വില്ലേജിലേക്ക് 2024 ഫെബ്രുവരി 1 മുതൽ 18 വരെ പ്രവേശനം അനുവദിക്കുന്നതാണ്.

അന്താരാഷ്ട്ര തലത്തിൽ തന്നെ പ്രശസ്തരായ കലാകാരൻമാർ അണിയിച്ചൊരുക്കുന്ന ഷാർജ ലൈറ്റ് ഫെസ്റ്റിവലിൽ ഇത്തവണ പ്രകാശാലങ്കാരങ്ങൾ, സംഗീതപരിപാടികൾ എന്നിവ ഉണ്ടായിരിക്കുമെന്ന് സംഘാടകർ അറിയിച്ചിട്ടുണ്ട്. താഴെ പറയുന്ന ഇടങ്ങളിലാണ് ഷാർജ ലൈറ്റ് ഫെസ്റ്റിവലിന്റെ ഭാഗമായി വർണ്ണകാഴ്ചകൾ ഒരുങ്ങുന്നത്.

-ജനറൽ ഡയറക്ടറേറ്റ് ഓഫ് ഷാർജ പോലീസ്.
-ജനറൽ സൂഖ്, അൽ ഹമിരിയ.
-കൽബ വാട്ടർഫ്രന്റ്.
-ഖാലിദ് ലഗൂൺ.
-അൽ മജാസ് വാട്ടർഫ്രന്റ്.
-BEEAH ഗ്രൂപ്പ് ഹെഡ്ക്വാർട്ടേഴ്‌സ്.
-അൽ ദൈദ് ഫോർട്ട്.
-ഷാർജ മോസ്‌ക്.
-ഷെയ്ഖ് റാഷിദ് അൽ ഖസ്സിമി മോസ്‌ക്.
-അൽ നൂർ മോസ്‌ക്.
-അൽ റഫിസാഹ് ഡാം.
-യൂണിവേഴ്സിറ്റി സിറ്റി ഹാൾ ബിൽഡിങ്ങിന് മുൻപിലാണ് ലൈറ്റ് വില്ലേജ് ഒരുക്കുന്നത്.

എല്ലാ പ്രായത്തിലുമുള്ള സന്ദർശകർക്കും ആസ്വദിക്കാനാകുന്ന രീതിയിലായിരിക്കും ഷാർജ ലൈറ്റ് ഫെസ്റ്റിവലിന്റെ ഭാഗമായി എമിറേറ്റിലെ പ്രധാന ഇടങ്ങളെ അണിയിച്ചൊരുക്കുന്നത്. ഞായർ മുതൽ ബുധൻ വരെയുള്ള ദിനങ്ങളിൽ വൈകീട്ട് 6 മുതൽ രാത്രി 11 മണിവരെയും, വ്യാഴം, വെള്ളി, ശനി ദിനങ്ങളിൽ വൈകീട്ട് 6 മുതൽ രാത്രി 12 മണിവരെയും ഈ ദീപാലങ്കാരകാഴ്ചകൾ ആസ്വദിക്കാവുന്നതാണ്.

Content Highlights:The 13th Sharjah Light Festival will begin on February 7, 2024