ലുഫ്താന്‍സ സ്റ്റാഫ് പണിമുടക്ക് ഇന്ന്; വ്യോമ ഗതാഗതത്തെ സാരമായി ബാധിക്കും, നിരവധി വിമാനങ്ങൾ റദ്ദാക്കി

ബര്‍ലിന്‍: ജർമനിയിൽ വെര്‍ഡി ട്രേഡ് യൂണിയനിൽ അംഗങ്ങളായ ലുഫ്താന്‍സ ഗ്രൗണ്ട് സ്റ്റാഫ് ഇന്ന് പണിമുടക്ക് നടത്തും. ജർമൻ സമയം പുലര്‍ച്ചെ 4 മണിക്ക് ആരംഭിക്കുന്ന പണിമുടക്ക് നാളെ രാവിലെ 7.10 വരെ തുടരും. പണിമുടക്ക് വ്യോമഗതാഗത്തെ പ്രതികൂലമായി ബാധിക്കുമെന്ന് റിപ്പോർട്ട്. വേതനത്തില്‍ 12.5% വർധനവ് അല്ലെങ്കില്‍ അടുത്ത പന്ത്രണ്ട് മാസത്തേക്ക് പ്രതിമാസം കുറഞ്ഞത് 500 യൂറോ വർധിപ്പിക്കണമെന്ന് ആവശ്യപ്പെട്ടാണ് യൂണിയൻ സമരം.

ലുഫ്താന്‍സ ഗ്രൗണ്ട് സ്റ്റാഫിലെ 80 മുതല്‍ 90 ശതമാനം വരെയുള്ള ആളുകൾ പണിമുടക്കിൽ പങ്കെടുക്കുമെന്നാണ് റിപ്പോർട്ട്. പണിമുടക്ക് ഫ്രാങ്ക്ഫര്‍ട്ട്, മ്യൂണിക്ക്, ഹാംബുര്‍ഗ്, ബര്‍ലിന്‍, ഡ്യൂസല്‍ഡോര്‍ഫ് എന്നീ വിമാനത്താവളങ്ങളിലെ സർവിസിനെ ബാധിക്കുമെന്നാണ് വിവരം. അറ്റകുറ്റപ്പണി മുതല്‍ പാസഞ്ചര്‍, എയര്‍ക്രാഫ്റ്റ് കൈകാര്യം ചെയ്യല്‍ വരെയുള്ള തൊഴിലുകളിൽ ഏർപ്പെടുന്ന ഗ്രൗണ്ട് സ്റ്റാഫുകളും പണിമുടക്കിനെ പിന്തുണയ്ക്കുന്നുണ്ട്.

പ്രതിദിനം 3,000 ഫ്‌ളൈറ്റുകൾ നടത്തുന്ന ലുഫ്താൻസയുടെ നിരവധി സർവിസുകൾ ഇന്ന് റദ്ദ് ചെയ്തതായാണ് റിപ്പോർട്ടുകൾ. പണിമുടക്ക് ലുഫ്താൻസയുടെ പ്രവർത്തനങ്ങളിൽ ഉണ്ടാക്കിയേക്കാവുന്ന ആഘാതം വിലയിരുത്തുന്നതിനായി ഒരു എമർജൻസി ടൈംടേബിൾ വികസിപ്പിക്കാനുള്ള ശ്രമത്തിലാണ്. എന്നിരുന്നാലും, ഫ്ലൈറ്റ് റദ്ദാക്കലുകളുടെ കൃത്യമായ എണ്ണം നിർണ്ണയിക്കാൻ ഇനിയും സമയമുണ്ടെന്ന് റോയിട്ടേഴ്‌സ് റിപ്പോർട്ട് ചെയ്തു.

വിവിധ ലുഫ്താന്‍സ ശാഖകളിലെ 25,000 ഗ്രൗണ്ട് സ്റ്റാഫുകൾ വെര്‍ഡി ട്രേഡ് യൂണിയനിൽ അംഗങ്ങളാണ്. ലുഫ്താന്‍സയുടെ ഉടമസ്ഥതയിലുള്ള ഡിസ്കവര്‍ എയര്‍ലൈന്‍സിലെ പൈലറ്റുമാരുടെ 48 മണിക്കൂര്‍ ഇന്ന് അവസാനിക്കുന്നതിന് മുൻപാണ് പുതിയ സമരപ്രഖ്യാപനം‌. കഴിഞ്ഞയാഴ്ച സുരക്ഷാ ജീവനക്കാരുടെ പണിമുടക്കിനെത്തുടര്‍ന്ന് രാജ്യത്തുടനീളമുള്ള നൂറുകണക്കിന് വിമാനങ്ങള്‍ സർവിസ് റദ്ദാക്കിയിരുന്നു.