'300 സീറ്റുകള്‍ നിങ്ങള്‍ നല്‍കിയപ്പോള്‍ ഞങ്ങള്‍ രാമക്ഷേത്രമുണ്ടാക്കി, 400 സീറ്റ് നല്‍കിയാല്‍ രാജ്യത്ത് ഗോവധം പൂര്‍ണമായും നിര്‍ത്തലാക്കും'ബി.ജെ.പി ദേശീയ വക്താവ്

ലഖ്നൗ: ബി.ജെ.പിക്ക് 400 സീറ്റ് ലഭിച്ചാല്‍ രാജ്യം മുഴുവന്‍ ഗോവധം നിര്‍ത്തലാക്കുമെന്ന് ദേശീയ വക്താവ് സയ്യിദ് ഷാനവാസ് ഹുസൈന്‍. അതിനു വേണ്ടി മോദി സര്‍ക്കാരിന്റെ ഇടപെടലുണ്ടാകുമെന്നും ഷാനവാസ് ഹുസൈന്‍ കൂട്ടിച്ചേര്‍ത്തു.

അഖില ഭാരതീയ ധര്‍മ സംഘം 'കൗ ആന്‍ഡ് ഇന്ത്യ' എന്ന പേരില്‍ സംഘടിപ്പിച്ച സമ്മേളനത്തില്‍ സംസാരിക്കുകയായിരുന്നു ഷാനവാസ് ഹുസൈന്‍.

'രാജ്യത്തെ ജനങ്ങള്‍ ബി.ജെ.പിക്ക് 300 സീറ്റ് നല്‍കിയപ്പോള്‍ ശ്രീരാമന്‍ അയോധ്യയിലെത്തി. ഇത്തവണ ബി.ജെ.പിക്ക് 400 സീറ്റ് ലഭിച്ചാല്‍ രാജ്യം മൊത്തത്തില്‍ ഗോവധം നിര്‍ത്തലാക്കും. ഗോവധം പൂര്‍ണമായി നിരോധിക്കണമെന്ന അഭിപ്രായക്കാരനാണ് ഞാന്‍. മോദി സര്‍ക്കാര്‍ എന്തായാലും അതിനു വേണ്ടി പ്രവര്‍ത്തിക്കും'-അദ്ദേഹം പ്രഖ്യാപിച്ചു.

ഹിന്ദൂയിസം ഒരു മതമല്ല, ജീവിതരീതിയാണെന്നും ഷാനവാസ് ഹുസൈന്‍ പറഞ്ഞു.
അയോധ്യയോടുള്ള തെറ്റായ നിലപാട് ഇന്ത്യയിലെ മുസ്ലിംകളുടെ അബദ്ധങ്ങളിലൊന്നായിരുന്നുവെന്നും മുന്‍ കേന്ദ്രമന്ത്രി പറഞ്ഞു. രാജ്യത്തെ മുസ്ലിംകള്‍ മൂന്ന് അബദ്ധങ്ങള്‍ ചെയ്തിട്ടുണ്ട്. ഖിലാഫത്ത് പ്രസ്ഥാനത്തെ പിന്തുണച്ചതാണ് ഒന്നാമത്തേത്. വിഭജന സമയത്ത് പാകിസ്താനെ പിന്തുണച്ചതാണ് മറ്റൊന്ന്. അയോധ്യയോട് സ്വീകരിച്ച തെറ്റായ നിലപാടാണ് മൂന്നാമത്തേതെന്നും ഷാനവാസ് കൂട്ടിച്ചേര്‍ത്തു.