ലണ്ടന്‍: 2021ലെ അവസാന പ്രീമിയര്‍ ലീഗ് മത്സരത്തില്‍ മാഞ്ചസ്റ്റര്‍ യുണൈറ്റഡിന് ജയം. ഇന്നലെ ഓള്‍ഡ്ട്രാഫോര്‍ഡില്‍ ബേര്‍ണ്‍ലിയെ നേരിട്ട മാഞ്ചസ്റ്റര്‍ യുണൈറ്റഡ് ഒന്നിനെതിരെ മൂന്നു ഗോളുകളുടെ വിജയമാണ് നേടിയത്.
ന്യൂകാസിലിനെതിരേ നടത്തിയ നിരാശയാര്‍ന്ന പ്രകടനം മറക്കാന്‍ കൂടുതല്‍ മാറ്റങ്ങളുമായാണ് യുണൈറ്റഡ് ഇറങ്ങിയത്. മത്സരത്തിന്റെ എട്ടാം മിനുട്ടില്‍ തന്നെ ലീഡ് എടുക്കാന്‍ മാഞ്ചസ്റ്റര്‍ യുണൈറ്റഡിനായി. പെനാല്‍ട്ടി ബോക്‌സിന് പുറത്ത് നിന്നുള്ള ഷോട്ടില്‍ നിന്ന് മക്ടോമിനയാണ് യുണൈറ്റഡിനായി ആദ്യ ഗോള്‍ നേടിയത്.
കഴിഞ്ഞ ഫെബ്രുവരിക്ക് ശേഷമുള്ള മക്ടോമിനയുടെ ആദ്യ ലീഗ് ഗോളായിരുന്നു ഇത്. 27ാം മിനുട്ടില്‍ സെല്‍ഫ് ഗോളിലൂടെ യുണൈറ്റഡ് ലീഡ് ഇരട്ടിയാക്കി. ഇടതു വിങ്ങില്‍ നിന്ന് മുന്നേറി സാഞ്ചോ തൊടുത്ത ഷോട്ട് ബേര്‍ണ്‍ലി ക്യാപ്റ്റന്‍ മീയുടെ കാലില്‍ തട്ടി വലയില്‍ എത്തുക ആയിരുന്നു.
35ാം മിനുട്ടില്‍ ഒരു ടാപിന്നുലൂടെ റൊണാള്‍ഡോ യുണൈറ്റഡിന്റെ മൂന്നാം ഗോള്‍ നേടി. മക്ടോമിനയുടെ ഷോട്ട് പോസ്റ്റില്‍ തട്ടി മടങ്ങിയെങ്കിലും ക്രിസ്റ്റിയാനോ പന്ത് വലയിലെത്തിക്കുകയായിരുന്നു.38ാം മിനുട്ടില്‍ ലെനനിലൂടെ ബേണ്‍ലി ഒരു ഗോള്‍ മടക്കി. പിന്നീട് മത്സരത്തില്‍ ഗോളുകളൊന്നും പിറന്നില്ല.ഇതോടെ മത്സരം 31 എന്ന സ്‌കോറിന് അവസാനിച്ചു. ജയത്തോടെ മാഞ്ചസ്റ്റര്‍ യുണൈറ്റഡ് ലീഗില്‍ 31 പോയിന്റുമായി ആറാം സ്ഥാനത്തെത്തി.