കാളികാവ്: മലയോര മേഖലയില്‍ കൃഷിയില്‍ മികവു പുലര്‍ത്തിയ റിട്ട: അധ്യാപകനു സ്‌കൂള്‍  പി.ടി.എയുടെ ആദരം. കല്ലാമൂല കേളുനായര്‍ പടിയിലെ മാത്യുവിനെയാണു പുല്ലങ്കോട് ഗവ:  ഹയര്‍ സെക്കന്‍ഡറി സ്‌കൂളിലെ പി.ടി.എ ആദരിച്ചത്. വീട്ടുവളപ്പില്‍ വിവിധയിനം കൃഷികള്‍  ചെയ്താണ് ഇദ്ദേഹം മികവു തെളിയിച്ചിട്ടുള്ളത്. പുല്ലങ്കോട് ഹൈസ്‌കൂളിലെ 29 വര്‍ഷത്തെ  സേവനത്തിനു ശേഷം വിവിധയിനം കൃഷികളെക്കുറിച്ച് പഠിച്ച് വീട്ടുമുറ്റത്ത്  പ്രാവര്‍ത്തികമാക്കുകയായിരുന്നു. പി.ടി.എ പ്രസിഡന്റ് ഉണ്ണികൃഷ്ണര്‍ മാത്യുവിനെ പെന്നാടയണിയിച്ച് ആദരിച്ചു. പ്രധാനാധ്യാപകന്‍  പയസ് ജോര്‍ജ്, ചേക്കാട് കൃഷി ഓഫീസര്‍ കെ.പി ശ്രീജ, പ്രഭാകരന്‍, റുഖിയ്യ, ബെസി എന്നിവര്‍  സംസാരിച്ചു.