ന്യൂഡല്‍ഹി: പ്രദേശവാസികള്‍ എന്ന മട്ടില്‍ സമരക്കാര്‍ക്കു നേരെ അതിക്രമം നടത്തിയത് ആര്‍.എസ്.എസ്, ബി.ജെ.പി പ്രവര്‍ത്തകരാണെന്ന ആരോപണവുമായി കര്‍ഷകര്‍. നാട്ടുകാരുടെ ഭാഗത്തു നിന്ന് ഇത്തരത്തില്‍ ഒരു നീക്കമുണ്ടാവില്ലെന്നും അവര്‍ ചൂണ്ടിക്കാട്ടുന്നു. സമരം തകര്‍ക്കാന്‍ സര്‍ക്കാറിന്റെ ഒത്താശയോടെയുള്ള നീക്കമായിരുന്നു ഇതെന്നും അവര്‍ ചൂണ്ടിക്കാട്ടുന്നു. ക്രമസമാധാനമുണ്ടെന്ന് വരുത്തി തീര്‍ക്കാനുള്ള ബോധപൂര്‍വ്വമായ ശ്രമമാണ് നടക്കുന്നത്.

ഉച്ചയോടെയാണ് സിംഘു അതിര്‍ത്തിയിലെ സമരമുഖത്തേക്ക് 200ഓളം വരുന്ന സംഘം അതിക്രമിച്ചു കയറിയത്. കര്‍ഷകര്‍ക്കു നേരെ കല്ലേറ് നടത്തിയ ഇവര്‍ ടെന്റുകള്‍ നശിപ്പിക്കുകയും ചെയ്തു. കര്‍ഷകരെ രാജ്യദ്രോഹികളെന്നും മറ്റും വിളിച്ചാണ് ഇവരെത്തിയത്. ദേശീയ പതാകയെ അപമാനിച്ചെന്നും ഇവര്‍ ആരോപിച്ചിരുന്നു.