കൊല്ലം: കൊട്ടാരക്കയില്‍ നിന്ന് കെ.എസ്.ആര്‍.ടി.സി ബസ് കാണാതായി. ഗാരേജില്‍ കയറ്റിയ ബസാണ് കാണാതായത്. പിന്നാലെ, പരാതി നല്‍കിയതിനെ തുടര്‍ന്ന് പൊലിസ് അന്വേഷിച്ച് കണ്ടെത്തി. പാരിപ്പള്ളിയില്‍ ഉപേക്ഷിച്ച നിലയിലായിരുന്നു ബസ്.

കൊട്ടാരക്കര മുനിസിപ്പാലിറ്റി ഓഫീസിന് മുന്നില്‍ നിന്നാണ് ബസ് മോഷണം പോയത്. സര്‍വീസ് ചെയ്ത് മുനിസിപ്പാലിറ്റി ഓഫീസിന് സമീപം പാര്‍ക്ക് ചെയ്തിരുന്ന ബസ് എടുക്കാനായി രാവിലെ ഡ്രൈവര്‍ എത്തിയപ്പോള്‍ വണ്ടി ഉണ്ടായിരുന്നില്ല. തുടര്‍ന്ന് എല്ലാ സ്റ്റാഫുകളോടും അന്വേഷിച്ചെങ്കിലും അറിയില്ലെന്നായിരുന്നു മറുപടി. KL 15 - 7508 നമ്പര്‍ വേണാട് ബസാണ് മോഷ്ടിക്കപ്പെട്ടത്. തുടര്‍ന്ന് ഡിപ്പോ അധികൃതര്‍ കൊട്ടാരക്കര പൊലിസിന് പരാതി നല്‍കി. തുടര്‍ന്ന് ബസ് പാരിപ്പള്ളിയില്‍ നിന്ന് കണ്ടെത്തി.

ഏതാനും ദിവസം മുമ്പ് കൊല്ലത്തും ഇതിന് സമാനമായ സംഭവം ഉണ്ടായിരുന്നു. രാത്രി ഏറെ വൈകിയിട്ടും ബസ് വരാതിരുന്നതോടെ നിര്‍ത്തിയിട്ടിരുന്ന ഒരു ബസ് യാത്രക്കാരന്‍ എടുത്തുകൊണ്ടുപോവുകയായിരുന്നു. ഇത്തരം സംഭവങ്ങള്‍ ആവര്‍ത്തിക്കുന്നത് കെ.എസ്.ആര്‍.ടി.സിക്കും പൊലിസിനും തലവേദനയായിരിക്കുകയാണ്.