തിരുവനന്തപുരം
ഏക സിവിൽ കോഡ്, ഹിജാബ് വിഷയങ്ങളിൽ ഗവർണർ ആരിഫ് മുഹമ്മദ് ഖാൻ നടത്തിയ പ്രസ്താവനകൾ അദ്ദേഹം ആർ.എസ്.എസ് അജൻഡ നടപ്പാക്കാൻ ശ്രമിക്കുന്നതിന്റെ ഭാഗമാണെന്ന് കോൺഗ്രസ് എം.പി കെ. മുരളീധരൻ. ഏക സിവിൽകോഡ് ആരും ചർച്ചചെയ്യാത്ത സമയത്താണ് ഗവർണർ പ്രതികരണം നടത്തിക്കൊണ്ടിരിക്കുന്നത്. ഗവർണർ സ്ഥാനത്തോട് നീതി കാണിച്ചില്ലെങ്കിൽ യു.ഡി.എഫ് ശക്തമായ നിലപാടെടുക്കും. ഗവർണറും മുഖ്യമന്ത്രിയും ഒത്തുകളിക്കുന്നതിന് തെളിവാണ് ബി.ജെ.പി നേതാവിനെ ഗവർണറുടെ പി.എ ആയി നിയമിച്ചത്. ആർ.എസ്.എസ് പ്രതിനിധിയായ ഗവർണറും കമ്യൂണിസ്റ്റ് പ്രതിനിധിയായ മുഖ്യമന്ത്രിയും ഒത്തുകളിക്കുന്നു. ഈ നിയമനം പഞ്ചാബിലും പശ്ചിമബംഗാളിലും നടക്കില്ല. കേരളത്തിൽ അവിശുദ്ധ കൂട്ടുകെട്ടാണെന്നും മുരളീധരൻ പറഞ്ഞു.