ന്യൂഡല്‍ഹി: കേന്ദ്രസര്‍ക്കാറിന്റെ സാമ്പത്തിക നയങ്ങളെ രൂക്ഷമായി വിമര്‍ശിച്ച് മുന്‍ പ്രധാനമന്ത്രിയും സാമ്പത്തിക ശാസ്ത്രജ്ഞനുമായ ഡോ. മന്‍മോഹന്‍ സിങ്. സാമ്പത്തിക നയങ്ങളെ കുറിച്ച് സര്‍ക്കാറിന് വലിയ ധാരണയില്ലെന്ന് അദ്ദേഹം തുറന്നടിച്ചു. ഭിന്നിപ്പിച്ച് ഭരിക്കുകയെന്ന ബ്രിട്ടീഷ് തന്ത്രമാണ് ഇപ്പോഴും സര്‍ക്കാര്‍ പയറ്റുന്നതെന്നും അദ്ദേഹം കുറ്റപ്പെടുത്തി.

പഞ്ചാബ് തെരഞ്ഞെടുപ്പ് പ്രചാരണവുമായി ബന്ധപ്പെട്ട് കോണ്‍ഗ്രസ് പുറത്തിറക്കിയ വീഡിയോയിലാണ് മന്‍മോഹന്റെ പ്രതികരണം. എല്ലാ കാര്യങ്ങള്‍ക്കും പ്രഥമ പ്രധാനമന്ത്രി ജവഹര്‍ലാല്‍ നെഹ്‌റുവിനെ കുറ്റപ്പെടുത്തുകയാണ് കേന്ദ്രം ചെയ്യുന്നതെന്നും അദ്ദേഹം പരിഹസിച്ചു.

'ഇന്നത്തെ സാഹചര്യങ്ങള്‍ ആശങ്കപ്പെടുത്തുന്നതാണ്. കൊവിഡ് കാലത്തെ സര്‍ക്കാറിന്റെ തെറ്റായ നയങ്ങള്‍ മൂലം സാമ്പത്തിക രംഗം ചുരുങ്ങി. വിലയും തൊഴിലില്ലായ്മയും വര്‍ധിച്ചു. ജനങ്ങള്‍ക്ക് ഇക്കാര്യത്തില്‍ രോഷമുണ്ട്. എന്നാല്‍ ഏഴു വര്‍ഷം ഭരിച്ചിട്ടും സ്വന്തം തെറ്റുകള്‍ തിരിച്ചറിഞ്ഞ് തിരുത്താതെ ആദ്യ പ്രധാനമന്ത്രി ജവഹര്‍ലാല്‍ നെഹ്‌റുവിനെ കുറ്റപ്പടുത്തുകയാണ് സര്‍ക്കാര്‍. പ്രധാനമന്ത്രിക്ക് പ്രത്യേക പ്രാധാന്യമുണ്ടെന്ന് ഞാന്‍ വിശ്വസിക്കുന്നു. ചരിത്രത്തെയോ രാജ്യത്തെയോ കുറ്റപ്പെടുത്തി നിങ്ങള്‍ക്ക് രക്ഷപ്പെടാനാകില്ല.' മന്‍മോഹന്‍ കൂട്ടിച്ചേര്‍ത്തു.

എന്റെ രാഷ്ട്രീയ നേട്ടത്തിനു വേണ്ടി ഞാനൊരിക്കലും രാജ്യത്തെ വിഭജിച്ചിട്ടില്ല. രാജ്യത്തിന്റെ അന്തസ്സിനെയോ പ്രധാനമന്ത്രി പദത്തെയോ കളങ്കപ്പെടുത്തുന്ന രീതിയിലുള്ള ഒരു വിട്ടുവീഴ്ചക്കും ഞാന്‍ തയ്യാറായിട്ടില്ല. എല്ലാ വെല്ലുവിളികള്‍ക്കിടിയിലും ഞാന്‍ എന്റെ രാജ്യത്തിന്റെ അന്തസ്സും മഹത്വവും ഉയര്‍ത്തി പിടിച്ചു- മന്‍മോഹന്‍ പറഞ്ഞു.

'രാജ്യത്ത് പണക്കാര്‍ പണക്കാരും ദരിദ്രര്‍ ദരിദ്രരുമായി തുടരുന്ന സാഹചര്യമാണുള്ളത്. കേന്ദ്രത്തിന്റെ തെറ്റായ നയങ്ങള്‍ മൂലമാണിത്. വിദേശ നയങ്ങളിലും സര്‍ക്കാര്‍ സമ്പൂര്‍ണ പരാജയമാണ്. അതിര്‍ത്തിയിലെ ചൈനീസ് അധിനിവേശത്തെ മൂടിവയ്ക്കാനാണ് സര്‍ക്കാറിന്റെ ശ്രമം. രാഷ്ട്രീയ നേതാക്കള്‍ ആലിംഗനം ചെയ്തതു കൊണ്ടോ ക്ഷണിക്കാത്തിടത്തു പോയി ബിരിയാണി തിന്നതു കൊണ്ടോ ബന്ധങ്ങള്‍ മെച്ചപ്പെടുത്താനാകില്ല. വാഗ്ദാനങ്ങള്‍ നല്‍കാന്‍ എളുപ്പമാണ്. പാലിക്കാന്‍ പ്രയാസവും' അദ്ദേഹം ചൂണ്ടിക്കാട്ടി.

മോദി സര്‍ക്കാറിന്റെ സാമ്പത്തി നയങ്ങളേയും അദ്ദേഹം രൂക്ഷമായി വിമര്‍ശിച്ചു. സാമ്പത്തിക നയത്തെ കുറിച്ച് അവര്‍ക്ക് ഒരു ധാരണയുമില്ല. വിദേശനയത്തിലും മോദി സര്‍ക്കാര്‍ പരാജയമാണ്- അദ്ദേഹം പറഞ്ഞു.