തിരുവനന്തപുരം: നിയമസഭാ സമ്മേളനം നാളെ ആരംഭിക്കാനിരിക്കേ ഗവര്‍ണറും സര്‍ക്കാരും തമ്മിലുണ്ടായ പോരില്‍ അനുനയ നീക്കവുമായി സര്‍ക്കാര്‍. ഒടുവില്‍ ഗവര്‍ണര്‍ നയപ്രഖ്യാപനത്തില്‍ ഒപ്പിട്ടു. ഇതോടെ നിയമസഭാ സമ്മേളനത്തിലെ അനിശ്ചിതത്വവും നീങ്ങി.
ഗവര്‍ണറുടെ സമ്മര്‍ദത്തിന് സര്‍ക്കാര്‍ വഴങ്ങിയെന്നാണറിയുന്നത്. ഇതിന്റെ ഭാഗമായി പൊതുഭരണ സെക്രട്ടറിയെ തല്‍സ്ഥാനത്തുനീക്കിയാണ് ഗവര്‍ണറെ സര്‍ക്കാര്‍ അനുനയിപ്പിച്ചിരിക്കുന്നത്. പൊതുഭരണ സെക്രട്ടറി കെ.ആര്‍. ജ്യോതിലാലിനെ മാറ്റിയിരിക്കുകയാണ് സര്‍ക്കാര്‍.

പകരം ശാരദാ മുരളീധരനാണ് ചുമതല നല്‍കിയിരിക്കുന്നത്. വൈസ് ചാന്‍സലര്‍ നിയമനത്തില്‍ ഗവര്‍ണര്‍ സര്‍ക്കാരുമായി നേരിട്ട് ഏറ്റുമുട്ടിയതിനു പിന്നാലെയാണ് ഇന്ന് ഗവര്‍ണറും മുഖ്യമന്ത്രിയും തമ്മില്‍ ശോഭിച്ച് സംസാരിക്കുകയും ഇതിനുശേഷം പ്രശ്‌നം പരിഹരിക്കാതെ മുഖ്യമന്ത്രി മടങ്ങുകയും ചെയ്തത്. സമ്മേളനം ആരംഭിക്കുന്നതിനു മുന്നോടിയായുള്ള ഗവണര്‍ണറുടെ നയപ്രഖ്യാപന പ്രസംഗത്തില്‍ ഗവര്‍ണര്‍ ഒപ്പിട്ടിരുന്നില്ല. ഇതോടെയാണ് നിയമസഭാ സമ്മേളനത്തില്‍ അനിശ്ചിതത്വമായത്. ഇതോടെ സര്‍ക്കാര്‍ അനുനയ നീക്കവുമായി ചീഫ് സെക്രട്ടറിയെ തന്നെ രാജ്ഭവനിലേക്കയക്കുകയായിരുന്നു.

ബജറ്റ് സമ്മേളനത്തിന് തുടക്കത്തിലാണ് ഗവര്‍ണറുടെ നയപ്രഖ്യാപന പ്രസംഗം. അസാധാരണമായ പ്രതിസന്ധിയില്‍ നിന്നാണ് സര്‍ക്കാര്‍ രക്ഷപ്പെട്ടിരിക്കുന്നത്. മന്ത്രിസഭ അംഗീകരിച്ച നയപ്രഖ്യാപന പ്രസംഗത്തില്‍ ഒപ്പിടാന്‍ ഗവര്‍ണര്‍ ഇപ്പോഴാണ് തയ്യാറായത്. ആദ്യം സ്പീക്കറും മുഖ്യമന്ത്രിയും നേരിട്ട് ഇടപെട്ടെങ്കിലും പ്രസംഗത്തില്‍ ഒപ്പിടാന്‍ ഗവര്‍ണര്‍ തയ്യാറായിരുന്നില്ല.