ന്യൂഡല്‍ഹി: രാജ്യവ്യാപകമായുള്ള കര്‍ഷകരുടെ ട്രെയിന്‍ തടയല്‍ സമരം തുടങ്ങി. പഞ്ചാബ്, ഹരിയാന, യു.പി, രാജസ്ഥാന്‍ തുടങ്ങിയ സംസ്ഥനങ്ങളിലാണ് സമരം ശക്തം. വൈകീട്ട് നാലു വരെയാണ് സമരം.

പ്രതിഷേധം അക്രമാസക്തമാകാനുള്ളസാധ്യത കണക്കിലെടുത്ത് യുപി, ഹരിയാന, പഞ്ചാബ് സംസ്ഥാനങ്ങളില്‍ റെയില്‍വേ സ്റ്റേഷനുകള്‍ക്ക് സുരക്ഷ വര്‍ധിപ്പിച്ചു. റെയില്‍വേ സംരക്ഷണ സേനയെ കൂടാതെ സംസ്ഥാന പൊലിസിനെയും ഇവിടങ്ങളില്‍ വിന്യസിച്ചിട്ടുണ്ട്.

കര്‍ഷകരുടെ പ്രതിഷേധം കണക്കിലെടുത്ത് റെയില്‍വേ സര്‍വീസുകള്‍ വെട്ടിച്ചുരുക്കിയിരിക്കുകയാണ്. അതേസമയം സമാധാനപരമായി സമരം നടത്തണമെന്ന് കര്‍ഷക നേതാക്കള്‍ ആഹ്വാനം ചെയ്തിട്ടുണ്ട്. ഡല്‍ഹി അതിര്‍ത്തികളിലേക്ക് വരും ദിവസങ്ങളില്‍ കൂടുതല്‍ കര്‍ഷകര്‍ എത്തുമെന്നും നേതാക്കള്‍ വ്യക്തമാക്കി. സമരം മൂലം ആരും പ്രയാസപ്പെടില്ലെന്നും കുടുങ്ങുന്ന യാത്രക്കാര്‍ക്ക് ഭക്ഷണവും വെള്ളവും വിതരണം ചെയ്യുമെന്നും സമരസമിതി അറിയിച്ചു.