തിരുവനന്തപുരം
മന്ത്രിമാരുടെ പഴ്സണൽ സ്റ്റാഫിലുള്ളവർക്കു നൽകിവരുന്ന പെൻഷൻ തുടരുകതന്നെ ചെയ്യുമെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണൻ. കേരളത്തിൽ 1984 മുതൽ പഴ്സനൽ സ്റ്റാഫിലുള്ളവർക്ക് പെൻഷൻ നൽകിവരുന്നുണ്ട്. ഗവർണറല്ല ഇതുസംബന്ധിച്ച കാര്യങ്ങളിൽ തീരുമാനമെടുക്കേണ്ടതെന്നും അദ്ദേഹം വാർത്താസമ്മേളനത്തിൽ പറഞ്ഞു. ഒരു മന്ത്രിയോടൊപ്പം അഞ്ചു വർഷത്തേക്കാണ് സ്റ്റാഫിനെ നിയമിക്കുന്നത്. രണ്ടു വർഷത്തിനു ശേഷം ആളെ മാറ്റി പുതിയ ആളിനെ നിയമിക്കുന്നൂവെന്നതു തെറ്റായ ആരോപണമാണ്. ഗവർണർ സ്ഥാനം ആവശ്യമില്ലാത്ത പദവിയാണെന്ന അഭിപ്രായത്തിൽ ഉറച്ചുനിൽക്കുന്നു. എന്നാൽ, ഫെഡറൽ സംവിധാനത്തിൽ രാജ്യത്ത് ഗവർണർ പദവിയുണ്ട്. അതുകൊണ്ട് അതിനനുസരിച്ച് മുന്നോട്ടുപോകുന്നു. ഗവർണറും സർക്കാരും സംഘർഷത്തിൽ നിൽക്കേണ്ട സ്ഥാപനങ്ങളല്ല. യോജിച്ച് പോകേണ്ടവയാണ്. രണ്ടും തമ്മിൽ യുദ്ധമേഖലയാക്കാൻ ഉദ്ദേശിക്കുന്നില്ല. ഗവർണറുടെ നിലപാട് എന്താണെന്നു സമൂഹത്തിനു മനസിലായിട്ടുണ്ടെന്നും കോടിയേരി പറഞ്ഞു. ഗവർണറുടെ സ്റ്റാഫിൽ ആരെ നിയമിക്കുന്നുവെന്നത് ഗവർണറാണ് തീരുമാനിക്കേണ്ടത്. മന്ത്രിമാരുടെ സ്റ്റാഫിൻ്റെ കാര്യത്തിൽ മന്ത്രിമാരും. ഗവർണർ സർക്കാരിനോട് വസ്തുതകൾ ചോദിച്ചാൽ തെറ്റില്ല. അല്ലാതെയുള്ള ഇടപെടൽ അംഗീകരിക്കില്ലെന്നും കോടിയേരി പറഞ്ഞു.