കണ്ണൂര്‍: സി.പി.എം പ്രവര്‍ത്തകന്‍ ഹരിദാസിനെ കൊലപ്പെടുത്തിയ കേസിലെ പ്രതിയും ബി.ജെ.പി മണ്ഡലം പ്രസിഡന്റുമായ ലിജേഷിനെ ഫോണ്‍ വിളിച്ചത് ബന്ധു എന്ന നിലയിലാണെന്ന് പൊലിസുകാരന്റെ മൊഴി. അര്‍ധരാത്രി വാട്‌സ് ആപ്പില്‍ ലിജേഷിന്റെ മിസ്ഡ് കാള്‍ കണ്ട് തിരിച്ചു വിളിച്ചതാണെന്നും സിപിഒ സുരേഷ് മൊഴി നല്‍കി.

കൊലപാതകവുമായി ബന്ധപ്പെട്ട് ഇന്നലെ രാവിലെയാണ് അന്വേഷണ സംഘം സുരേഷിന്റെ മൊഴി എടുത്തത്. ലിജേഷിന്റെ ഫോണ്‍ പരിശോധിച്ചപ്പോള്‍ കൊലപാതകത്തിന് തൊട്ട് മുന്‍പ് സുരേഷിനെ വിളിച്ചതായി കണ്ടെത്തിയിരുന്നു.

കഴിഞ്ഞ ദിവസം അറസ്റ്റിലായവരുടെ ഫോണ്‍ രേഖകള്‍ പരിശോധിച്ചതില്‍ നിന്ന് കൊലയാളി സംഘത്തെ കുറിച്ചുള്ള നിര്‍ണായക വിവരങ്ങള്‍ പൊലിസിന് ലഭിച്ചു. ബി.ജെ.പി മണ്ഡലം പ്രസിഡന്റ് ലിജേഷും ഹരിദാസനൊപ്പം മത്സ്യബന്ധനത്തിന് പോയ സുനേഷും തമ്മില്‍ നടത്തിയ വാട്‌സ് ആപ്പ് ചാറ്റുകളും അന്വേഷണ സംഘം കണ്ടെടുത്തിട്ടുണ്ട്. പിന്നാലെയാണ് പുന്നോല്‍ സ്വദേശി നിജില്‍ ദാസിനെ പൊലിസ് കസ്റ്റഡിയില്‍ എടുത്തത്. ഇയാള്‍ കൃത്യത്തില്‍ നേരിട്ട് പങ്കെടുത്തതായാണ് സൂചന.