കന്‍ഗ്ര: ശ്രീലങ്കക്കെതിരായ ടി20 പരമ്പര സ്വന്തമാക്കി ഇന്ത്യ. മൂന്നാം ടി20യില്‍ ശ്രീലങ്കയെ ആറു വിക്കറ്റിന് പരാജയപ്പെടുത്തിയാണ് ഇന്ത്യ ജയം സ്വന്തമാക്കിയത്. മൂന്നാം മത്സരത്തിലും അര്‍ധ സെഞ്ചുറിയുമായി തിളങ്ങിയ ശ്രയസ് അയ്യരാണ് ഇന്ത്യന്‍ വിജയത്തിന് ചുക്കാന്‍ പിടിച്ചത്. ടോസ് നേടിയ ശ്രീലങ്ക ബാറ്റ് ചെയ്യാന്‍ തീരുമാനിക്കുകയായിരുന്നു. ആദ്യം ബാറ്റ് ചെയ്ത ലങ്ക നിശ്ചിത ഓവറില്‍ അഞ്ച് വിക്കറ്റ് നഷ്ടത്തില്‍ 146 റണ്‍സെടുത്തു.

മറുപടി ബാറ്റിങ്ങിനിറങ്ങിയ ഇന്ത്യ 16.5 ഓവറില്‍ നാല് വിക്കറ്റ് നഷ്ടത്തില്‍ ലക്ഷ്യം മറികടന്നു. 45 പന്തില്‍ 73 റണ്‍സ് നേടിയ അയ്യര്‍ ഔട്ടാകാതെ നിന്നു. ക്യാപ്റ്റന്‍ രോഹിത് ശര്‍മക്ക് ഇന്നലെയും കൂടുതല്‍ റണ്‍സ് നേടാന്‍ കഴിഞ്ഞില്ല. 9 പന്തില്‍ അഞ്ച് റണ്‍സ് മാത്രമാണ് രോഹിത് നേടിയത്.

12 പന്തില്‍ നിന്ന് 18 റണ്‍സ് സംഭാവന നല്‍കി സഞ്ജുവും മടങ്ങി. 15 പന്തില്‍ 22 റണ്‍സുമായി ഔട്ടാകാതെ നിന്ന രവീന്ദ്ര ജഡേജയും അയ്യരും ചേര്‍ന്നായിരുന്നു ഇന്ത്യയെ വിജയ തീരത്തെത്തിച്ചത്. ആദ്യ മത്സരത്തില്‍ 62 റണ്‍സന് ലങ്കയെ പരാജയപ്പെടുത്തിയപ്പോള്‍ രണ്ടാം മത്സരത്തില്‍ ഏവു വിക്കറ്റിനായിരുന്നു ഇന്ത്യയുടെ വിജയം.