തിരുവനന്തപുരം: രണ്ടു ടേം തുടര്‍ച്ചയായി മത്സരിച്ചവര്‍ക്ക് ഇളവു നല്‍കേണ്ടെന്ന സംസ്ഥാന കമ്മിറ്റിയുടെ തീരുമാനം നടപ്പാകുന്നതോടെ അഞ്ച് മന്ത്രിമാരും സ്പീക്കറുമടക്കം 23 സിറ്റിങ് എം.എല്‍.എമാരും പടിക്കുപുറത്താകും. സംസ്ഥാന സെക്രട്ടേറിയറ്റില്‍നിന്ന് എം.വി.ഗോവിന്ദനും കെ.എന്‍.ബാലഗോപാലും മത്സരിക്കും.
പീഡന വിവാദങ്ങളില്‍ പെട്ടു വിവാദത്തിലായ പി.കെ.ശശിക്കു ഷൊര്‍ണൂരില്‍ സീറ്റില്ല.
ശനി, ഞായര്‍ ദിവസങ്ങളായി ചേരുന്ന ജില്ലാ കമ്മിറ്റികള്‍ പട്ടിക സംബന്ധിച്ച് ചര്‍ച്ച ചെയ്യും. എട്ടിന് അന്തിമ പട്ടിക പുറത്തിറക്കും. പാലക്കാട്, മലപ്പുറം, വയനാട് ജില്ലകളിലെ സ്ഥാനാര്‍ഥികളെ സംബന്ധിച്ചും ചില മണ്ഡലങ്ങളിലെ സ്ഥാനാര്‍ഥികളെ സംബന്ധിച്ചു തീരുമാനമായിട്ടില്ല. പ്രാഥമിക പട്ടികയില്‍ ഉള്‍പ്പെട്ട ചില സ്ഥാനാര്‍ഥികള്‍ ജില്ലാ കമ്മിറ്റികളിലെ ചര്‍ച്ചയ്ക്കുശേഷം മാറാനിടയുണ്ട്.