റിയാദ്: ഹോത്താ ബനി തമീമിൽ ഇലക്ട്രീഷൻ ആയി ജോലി ചെയ്തു വരുന്നതിനിടെ അൽ ഖർജിൽ വെച്ച് വാഹനാപകടത്തിൽ പെട്ട് ഗുരുതര പരിക്ക് പറ്റി ചികിത്സയിൽ കഴിയുന്ന ആലപ്പുഴ കുട്ടനാട് സ്വദേശി രഞ്ജിത്തിന് ഹോത്താ മലയാളി ചാരിറ്റി ഓർഗനൈസേഷൻ [എച്ച് എം ഒ] സഹായധനം കൈമാറി. കഴിഞ്ഞ ജനുവരി 10 നാണ് അൽ ഖർജിൽ വെച്ച് ഒരാൾ മരണപെടുകയും രണ്ട് പേർക്ക് ഗുരുതര പരിക്ക് പറ്റുകയും ചെയ്ത വാഹനപടം നടന്നത്.

    തുടർന്ന് ഗുരുതര പരിക്ക് പറ്റിയ രഞ്ജിത്തിനെ അൽ ഖർജ് ഹോസ്പിറ്റലിൽ പ്രവേശിപ്പിക്കുകയും സാമൂഹ്യ പ്രവർത്തകരുടെ ഇടപെടലിലൂടെ തുടർചികിത്സക്ക് വേണ്ടി നാട്ടിലേക്ക് കയറ്റി വിടുകയും ചെയ്തിരുന്നു. സാമ്പത്തികമായി പിന്നോക്കം നിൽക്കുന്ന അവിവാഹിതനായ രഞ്ജിത്തിന് തലക്കും നട്ടെല്ലിനും കാര്യമായ പരിക്ക് പറ്റിയ സാഹചര്യത്തിൽ ഹോത്താ മലയാളീസ് ചാരിറ്റി ഓർഗാനൈസേഷൻ നേതൃത്വം സഹായത്തിനായി രംഗത്ത് വരുകയും ഹോത്തയിലെ സുമനസ്സുകളിൽ നിന്നും തുടർ ചികിത്സക്ക് വേണ്ടിയുള്ള തുക (60,000 ഇന്ത്യൻ രൂപ)കണ്ടെത്തി സ്വരൂപിക്കുകയുമായിരുന്നു. ഹോത്താ മലയാളി ചാരിറ്റി ഓർഗനൈസേഷൻ ചാരിറ്റി കൺവീനർ ത്വാഹാ സുബൈർ നേരിട്ട് രഞ്ജിത്തിന്റെ വീട്ടിലെത്തി സഹായധനം കൈമാറി.