ചെറുതോണി: കെ.സുധാകരനെതിരെ പ്രകോപന പരാമര്‍ശവുമായി സി.പി.എം ഇടുക്കി ജില്ല സെക്രട്ടറി സി.വി വര്‍ഗീസിന്റെ പ്രസംഗം. സിപി.എം നല്‍കുന്ന ഭിക്ഷയാണ് കെ.സുധാകരന്റെ ജീവനെന്നും അതും ഒരു നികൃഷ്ട ജീവിയെ കൊല്ലാന്‍ താല്‍പര്യമില്ലാത്തതു കൊണ്ടാണെന്നുമാണ് വര്‍ഗിസിന്റെ പരാമര്‍ശം. ചെറുതോണിയില്‍ സംഘടിപ്പിച്ച പരിപാടിയില്‍ സംസാരിക്കുമ്പോഴാണ് വിവാദ പരാമര്‍ശം.

കഴിഞ്ഞ ദിവസം കോണ്‍ഗ്രസിന്റെ നേതൃത്വത്തില്‍ സര്‍ക്കാറിന്റെ ഭരണപരാജയത്തിനെതിരെ ചെറുതോണിയില്‍ പൊതുയോഗം സംഘടിപ്പിച്ചിരുന്നു. ഇതിന് പിന്നാലെ സി.പി.എം നടത്തിയ പരിപാടിയിലാണ് സുധാകരനെതിരെ വിവാദ പരാമര്‍ശം ഉയര്‍ന്നത്.

ഇടുക്കി എഞ്ചിനീയറിങ് കോളജ് വിദ്യാര്‍ഥിയായ ധീരജിന്റെ കൊലപാതകത്തെ തുടര്‍ന്ന് പ്രദേശത്ത് സി.പി.എം-കോണ്‍ഗ്രസ് പോര് രൂക്ഷമാണ്. ധീരജ് വധത്തിന് പിന്നില്‍ പ്രവര്‍ത്തിച്ചത് ഇപ്പോള്‍ അറസ്റ്റിലായ കെ.എസ്.യുയൂത്ത് കോണ്‍ഗ്രസ് പ്രവര്‍ത്തകരല്ലെന്നും കെ.സുധാകരന്‍ നിലപാടെടുത്തിരുന്നു.