ന്യൂഡൽഹി
അന്താരാഷ്ട്ര വിമാന സർവിസുകൾ ഈ മാസം 27 മുതൽ ആരംഭിക്കും. കൊവിഡ് കേസുകൾ കുറഞ്ഞ സാഹചര്യത്തിലാണ് 25 മാസത്തെ നിരോധനത്തിന് ശേഷം അന്താരാഷ്ട്ര വിമാന സർവിസുകൾ തുടങ്ങാൻ വ്യോമയാന മന്ത്രാലയം തീരുമാനിച്ചിരിക്കുന്നത്. നേരത്തെ കഴിഞ്ഞ വർഷം ഡിസംബർ 15 മുതൽ സർവിസ് പുനരാരംഭിക്കാൻ തീരുമാനിച്ചിരുന്നെങ്കിലും ഒമിക്രോൺ വ്യാപനം ശക്തമായതോടെ പിൻവലിക്കുകയായിരുന്നു.
നിലവിൽ പ്രത്യേക കരാറിന്റെ അടിസ്ഥാനത്തിലുള്ള എയർ ബബിൾ സർവിസുകളും കാർഗോ സർവിസുകളും വ്യോമയാന മന്ത്രാലയത്തിന്റെ പ്രത്യേക അനുമതിയോടുകൂടിയുള്ള സർവിസുകളും മാത്രമാണ് ഇന്ത്യയിൽ നിന്ന് പുറത്തേക്കുള്ളത്.
2020 മാർച്ച് 23 മുതലാണ് ഇന്ത്യയിൽ അന്താരാഷ്ട്ര വിമാന സർവിസ് നിർത്തിവച്ചത്.