ലഖ്‌നോ: ഉത്തര്‍പ്രദേശ് നിയമസഭാ തെരഞ്ഞെടുപ്പില്‍ ബി.ജെ.പി ആധികാരിക വിജയം ഉറപ്പിച്ചതിനു പിന്നാലെ പ്രതികരണവുമായി ബോളിവുഡ് നടി ഹേമമാലിനി. ബുള്‍ഡോസറിനു മുന്നില്‍ ഒന്നിനും നില്‍ക്കാന്‍ കഴിയിലെന്ന് മഥുര ബി.ജെ.പി എംപിയായ ഹേമ മാലിനി പറഞ്ഞു. ഉത്തര്‍പ്രദേശില്‍ 275 സീറ്റുകളില്‍ ബിജെപി മുന്നിലാണ്. സമാജ്‌വാദി പാര്‍ട്ടി 121 സീറ്റുകളില്‍ ലീഡ് ചെയ്യുമ്പോള്‍ കോണ്‍ഗ്രസ് കേവലം രണ്ട് സീറ്റുകളിലാണ് മുന്നിട്ടുനില്‍ക്കുന്നത്.

ഞങ്ങളുടെ പാര്‍ട്ടി സര്‍ക്കാര്‍ രൂപീകരിക്കുമെന്ന് ഞങ്ങള്‍ക്കറിയാമായിരുന്നു, എല്ലാ വികസന മേഖലകളിലും ഞങ്ങള്‍ പ്രവര്‍ത്തിച്ചിട്ടുണ്ട്, അതിനാലാണ് പൊതുജനങ്ങള്‍ ഞങ്ങളെ വിശ്വസിക്കുന്നത്. ബുള്‍ഡോസറിന് മുന്നില്‍ ഒന്നിനും വരാന്‍ കഴിയില്ല. സൈക്കിളായാലും മറ്റെന്തുമായാലും ഒരു മിനിറ്റിനുള്ളില്‍ എല്ലാം അവസാനിപ്പിക്കാന്‍ ബുള്‍ഡോസറിന് കഴിയും.' ഹേമമാലിനി പറഞ്ഞു.

നേരത്തെ ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥിനെ അഖിലേഷ് യാദവ് 'ബാബ ബുള്‍ഡോസര്‍' എന്ന് വിളിച്ച് പരിഹസിച്ചത് വിവാദമായിരുന്നു.

ഉത്തര്‍ പ്രദേശ്, ഗോവ, മണിപ്പൂര്‍, ഉത്തരാഖണ്ഡ്, പഞ്ചാബ് എന്നീ സംസ്ഥാനങ്ങളിലാണ് ഇന്ന് വോട്ടെണ്ണല്‍ നടക്കുന്നത്. ഇതില്‍ പഞ്ചാബ് ഒഴികെ മറ്റ് സംസ്ഥാനങ്ങളില്‍ ബിജെപി അധികാരത്തിലേക്ക് നീങ്ങുകയാണ്.