കോട്ടയം: സ്ഥാനാര്‍ത്ഥി നിര്‍ണയത്തില്‍ ഉടക്കിയ മഹിളാ കോണ്‍ഗ്രസ് നേതാവ് ലതിക സുഭാഷിനെ അനുനയിപ്പിക്കാനുള്ള യു.ഡി.എഫ്. ശ്രമങ്ങളെല്ലാം പരാജയപ്പെട്ടു. ഒടുവില്‍ ഏറ്റുമാനൂരില്‍ സ്വതന്ത്രസ്ഥാനാര്‍ഥിയായി മത്സരിക്കാന്‍ ലതികാ സുഭാഷ് തീരുമാനിച്ചു. ഇന്ന് വൈകുന്നേരം അവരെ പിന്തുണക്കുന്നവരുടെ കണ്‍വന്‍ഷന്‍ വിളിച്ചുകൂട്ടി എല്ലാവരുടേയും അഭിപ്രായം ആരാഞ്ഞാണ് ലതിക പ്രഖ്യാപനം നടത്തിയത്. ഇന്ന്് യു.ഡി.എഫ് ജില്ലാ നേതാക്കള്‍ ലതികയുടെ വീട്ടിലെത്തിയിരുന്നു. ഏറ്റുമാനൂരില്‍ മത്സരിക്കുന്ന പ്രിന്‍സ് ലൂക്കോസും സംഘത്തിലുണ്ടായിരുന്നു. എന്നാല്‍ അനുനയ ശ്രമങ്ങള്‍ക്ക് അവര്‍ വഴങ്ങിയില്ല.
അതേ സമയം മത്സരിക്കാന്‍ തീരുമാനിച്ചവരേ പിന്തിരിപ്പിക്കേണ്ടെന്ന് ഉമ്മന്‍ ചാണ്ടി വ്യക്തമാക്കി. അതവരുടെ സ്വാതന്ത്ര്യമാണെന്നും അദ്ദേഹം വ്യക്തമാക്കി.

ഇന്ന് വൈകുന്നേരം ചേരുന്ന യോഗത്തില്‍ തന്നോടൊപ്പം നില്‍ക്കുന്ന പ്രവര്‍ത്തകരുടെ ആവശ്യമാണ് താന്‍ പരിഗണിക്കുകയെന്ന് അവര്‍ വ്യക്തമാക്കിയിരുന്നു. മത്സരിക്കുമെന്ന് പറഞ്ഞില്ലെങ്കിലും പ്രവര്‍ത്തകര്‍ എന്ത് പറയുന്നോ അതാണ് തന്റെ നിലപാടെന്ന് അവര്‍ നേതാക്കളോട് പ്രതികരിക്കുകയായിരുന്നു. ആ തീരുമാനമാണ് വൈകുന്നേരത്തോടെ പ്രഖ്യാപിക്കപ്പെട്ടത്. ഇത് കോണ്‍ഗ്രസ് നേതൃത്വത്തെ ഞെട്ടിച്ചിട്ടുണ്ട്.